Sinulat ni Dave S. Albarado
Gipasigarbo usab ni Gob. Arthur Yap sa iyang State of the Province Address (SOPA) ang mga programa ug kalamboan sa natad sa agrikultura sa lalawigan sa Bohol.
Mihatag si Yap sa iyang ikaduhang SOPA niadtong adlaw nga Huwebes, Hulyo 22, 2021 atol sa pagsaulog sa 167 ka tuig nga kasumaran sa Bohol Day.
Si Assistant Provincial Agriculturist Larry Pamugas namahayag pinaago sa usa ka video presentation nga ang programa sa Advanced Rice Technology (ART) nakapalig-on sa food security and sufficiency sa lalawigan sa Bohol.
Ang ART 120 program gitan-aw nga makapasaka sa gidaghanon sa ani sa mga mag-uuma sa Bohol.
Ang average nga gidaghanon sa ani sa usa ka maguuma ubos sa maong programa mokabat ug 140 ka cavans matag ektarya sa mga kaumahan nga nag salig sa ulan.
Matud pa ni Pamugas nga mokabat ug 220 ka cavan ang gidaghanon sa ani gikan sa kaumahan nga nagsalig sa irigasyon, ubos sa ART 160 nga programa.
Ang programa sa pagumasa Bohol nakatabang usab sa mga mag-uuma sa pag-market sa ilang abot pinaagi sa pagbaligya sa ilang abot nga humay ubos sa brand name nga Bugas ni Dagohoy.
Ang programa nga ART CORN 100 naghatag ug higayon sa mga maguuma nga diin mosaka ang ilang ani sa 100 sakonsa mais kada ektarya nga makatabang usab sa pagpalig-on sa seguridad sa pagkaon ug food self-sufficiency dinhi sa Bohol.
Gitutokan usab sa kagamhanang probinsiyal ang pagmugna ug pagugmad sa mga fish ponds ug fish cages aron mamenosan ang pagsalig sa isda gikan sa dagat ug makahatag ug kasulbaran sa mahal nga presyo sa isda sa Bohol.
Samtang si Provincial Veterinarian Dr. Stella Maris Lapiz mibatbat sa milk feeding program nga gipasiugdahan sa kagamhanang probinsyal diin makatabang kini nga mahalin ang abot sa mag uuma kay ang gatas nga ilang i-produce ihatag sa mga kabataan aron batokan ang malnutrisyon.
Lakip usab sa gitutokan sa kagamhanang probinsiyal ang pag-ugmad sa panubig aron makahatag ug luwas ug hinlo nga tubig alang sa katawhan ilabi kadtong nagpuyo sa mga isla nga barangay sa Bohol.
Subay niini, ang kagamjanang probinsyal nagsugod ug hatag ug P100,000 nga hinabang sa kada barangay sa Bohol ug P1 milyon nga ayuda sa mga local government units alang sa pagugmad sa ilang mga waterworks system.