Sinulat ni Dave Albarado
Gipahibalo ni First District Congressman Edgar Chatto nga nalipay ang mga pangu sa mga local government units kon LGU tungod kay ang Mandanas ruling nga gipakanaog sa Korte Suprema makahatag ug dugang nga pondo alang sa mga proyekto.
Matod sa kongresista atol sa interview sa usa ka programa sa radyo nga gumikan sa ruling, madugangan na unya ang budget sa mga LGU nga magamit sa pagserbisyo sa katawhan.
Ang Mandanas ruling mao ang desisyon nga gipakanaog sa Korte Suprema pinasikad sa kaso nga gipasaka ni Batangas Gov. Hermiliano Mandanas.
Ang desisyon nagmando nga ang “just share” o makataronganong bahin sa mga LGUs, nga naila usab nga Internal Revenue Allotment (IRA), kinahanglang i-compute base sa tanang national taxes, ug dili lang kay gikan sa National Internal Revenue Taxes (NIRT).
Matod ni Chatto nga adunay mga buhis nga wala naapil sa computation sa share sa IRA sama sa buhis gikan sa Customs ug uban pa, nga karon maapil na gumikan sa maong desisyon sa Korte Suprema.
Ang Batakang Balaod nagmando nga ang mga LGU kinahanglang adunay makataronganon nga bahin sa tanang buhis nga gikolekta.
Matod sa kongresista nga moepekto ang implementasyon sa Mandanas ruling sa budget sa mga LGUs sa tuig 2022.