Sinulat ni Rey Anthony Chiu
Duha sa ka balaodnon nga buot sa Presidente nga ipalusot sa hiniusang Kongreso, dala sa pagseguro nga dili na mapakuratan pa ang nasud sa pagtapnas sa mga pandemya nga ingon ka kuyaw sa Coronavirus Disease (Covid).
Ang duha ka mga balaodnon ang buot ni Presidente Rodrigo Duterte nga aksyonan sa labing dali nga panahon sa Kongreso aron matagamtam pa sa katawhan ang dugang kasayon sa pamuhunan ug negosyo aron buhi-on ang ekonomiyang gipalup-og sa pandemya.
Sa iyang ika unom nga State of the Nation Address (SONA) niadtong Hulyo 26, 2021, nga iyang gibatbat atubangan sa nagkahiusang Senado ug Ubos Balay Balaoranan, gipadayag ni Presidente Duterte ang pagmugna sa Philippine Center for Disease Control and Prevention ug ang Virology Institute of the Philippines.
Ang tumong sa mugnaon nga mga sentro mao ang pagugmad sa nasud ug kaugalingong programa sa pagpugong sa pagkatag sa sakit-mananakod ug ang pagtuki sa kalibutan sa virus aron makamugna ug tambal niini ang mga Pinoy nga mga siyentipiko.
Ang duha lakip sa mga balaodnon nga buot sa presidente nga ikapagawas sa dili pa siya motapos sa serbisyo isip pangulo sa nasud sa Hunyo 2022.
Tungod sa nasundong piniliay sa sunod tuig, mangandam na usab ang mga magbabalaod sa Senado ug Ubos Balay balaoranan lakip na ang mga representante sa mga partylists alang sa kampanya nga magsugod sa unang kwarter sa 2022.