Sinulat ni John Paul Elicano
Wala pay plano ang kagamhanan nga magpatuman ug hugot nga mga lakang sa quarantine sa tibu-ok nasud bisan pa sa hulga sa labing makatakod nga Delta variant sa Coronavirus disease (Covid) matud pa sa taho sa Malacañang niadtong Hulyo 27, 2021.
Kini human ang OCTA Research Group mirekomenda sa pagmando sa “anticipatory, preventive, and circuit-breaking lockdowns” aron sa paglikay sa dugang nga pagkuyanap sa Delta variant.
Matud pa ni Presidential Spokesperson Harry Roque, ang Inter-Agency Task Force (IATF) nag-prayoridad hinuon sa kinatibuk-ang kahimsog sa mga katawhan sa nasud aron masiguro ang mga Pilipino makabawi ug dali gikan sa epekto sa Covid nga pandemya.
Matod pa sa kalihim sa gipahigayong press conference didto sa Subic Bay Freeport Zone, wala pay rekomendasyon sa hugot nga lockdown tungod kay ang mahinungdanon mao ang kinatibuk-ang kahimsog sa mga Pilipino ug kini gi-balanse sa kagamhanan.
Nihatag ug rekomedasyon ang OCTA Research human ang Metro Manila nakatala ug dul-an sa 1,000 ka mga kaso sa Covid adlaw-adlaw taliwala sa hulga sa Delta variant.
Ang Pilipinas nakatala ug kinatibuk-ang 119 ka mga kaso sa Delta Covid variant diin ang 103 niini naayo na, 12 ang nagpa-ayo pa lang, samtang 4 na ang namatay.