Sinulat ni Dave Albarado
Nagkalain laing hut-ong sa katawhang Bol-anon niduyog sa pagtimbaya sa kadaogan ni weightlifter Hidilyn Diaz nga nakuha ang labing unang gold medal sa Olympics alang sa Pilipinas.
Nakuha ni Diaz ang medalyang bulawansa 55 kg category sa weightlifting sa Tokyo Olympics niadtong Hulyo 26, 2021.
Nagpadangat ug mga pagtimbaya pinaagi sa social media ug ubang pamaagi ang mga Bol-anon alang kang Diaz sa kalamposan nga iyang naangkon nga naghatag ug dungog sa mga Pilipino.
Mga ordinaryong Bol-anon, mga kabataan, mga trabahante ug opisyal sa gobyerno, kaparian ug uban pa nga nagpakita sa ilang kalipay ug mapasigarbohon kang Diaz.
Lakip sa mga nagpadangat sa pagtimbaya ug pagtimbaya kang Diaz sila si Gov. Art Yap, City Mayor John Geesnell Yap, 3rd district Rep. Kristine Alexie Tutor ug ubang mga opisyal sa kagamhanan.
Apil nga mipadayag ug pagtimbaya kang Diaz ang Bol-anong boksidor nga si Mark “Magnifico” Magsayo, ug si Tagbilaran Bishop Alberto Uy.
Niadtong Martes, Hulyo 27, 2021, ang Sangguniang Panlalawigan sa Bohol mipasar ug usa ka resolution nga nagtimbaya kang Diaz sa iyang makasaysayanon nga kadaogan sa Olympics.