Sinulat ni Ruffa Mae F. Evardo
Gipahibalo ni British Secretary of State for Foreign, Commonwealth and Development Affairs Raab Dominic, nga nagpadala ang United Kingdom ug 415,000 ka doses sa bakuna nga AstraZeneca nganhi sa Pilipinas aron matabangan ang nasud nga masulbad ang pandemiya pinaagi sa pagpalapad sa pagpangbakuna.
Sa usa ka pahayag, giingon sa kagamhanan sa Britanya, nga ang pagpadala sa bakuna sa Pilipinas, bahin sa unang hugna sa 100 milyon nga doses sa bakuna nga gipasalig sa UK nga ihantag nga libre.
Subay niini, tumong sa Britanya nga makuha sa labing kabus nga mga bahin sa kalibutan ang bakunahan sa labing dali nga panahon.
Ang United Kingdonm usab misaad nga magdonar ug 100 milyon nga mga bakuna mga langyaw nga nasud, sa pahayag niadtong Hunyo 2022.
Sa gisaad nga bakuna, ang 80 milyon diin, adto kadulong sa Covax Facility, nga ipang-apud-apod usab gihapon sa mga nasud nga nagsagubang sa sakit.
Ang donasyon sa bakuna sa UK gikan sa bakuna sa University of Oxford-AstraZeneca, nga ginama sa Oxford Biomedica sa Oxford ug giandam sa Wrexham, North Wales.
Matod sa British Ambassador sa Pilipinas nga si Daniel Pruce, gitabangan sa United Kingdom nga maabot sa mga nasud ang mga bakuna sa Covid-19.
Dugang niya, ang pagdonar sa 415 mil ka doses sa bakuna sa Oxford-AstraZeneca sa Pilipinas, nagtumong aron daghang mabakunahan nga Pinoy, taliwala sa nag-ong-ong nga hulga sa Delta variant.