Sinulat ni Elvira Bongosia
Magpadayon ang Brigada Eskwela sa Department of Education (DepEd) karong tuig bisan walay mahitabong face-to-face classes.
Sa bag-ong gipagawas nga memorandum order sa DepEd alang sa mga schools division offices ug regional offices, ang pagpahigayon sa Brigada Eskwela nagsugod niadtong Agosto 3 hangtod Setyembre 30, 2021.
Ang maong aktibidad karong tuig nagdala sa tema nga “Bayanihan para sa Paaralan” ug “Handang Paaralan para sa Handang Pasukan.”
Ang Brigada Eskwela 2021 nagtinguha sa pagpalig-on sa pagbayanihan sa DepEd ug mga stakeholders alang sa padayon nga paghatod sa dekalidad nga edukasyon taliwala sa pandemya karong umaabot nga pagbukas sa klase.
Ang National Kick-Off Ceremony ipahigayon niadtong Agosto 3, 2021 sa pagpanguna sa Schools Division Office sa Tagum City sa DepEd Region 11.
May kaugalingon usab nga kick-off ceremony ang mga Regional Offices ug Schools Division Offices sa nagkalain-laing lugar.
Sa Setyembre 12 gitakda ang pagbukas ug balik sa klase sa mga pampublikong tunghaan.