Sinulat ni Elvira Bongosia
Giseguro sa Department of Health (DOH) nga igo ang supply sa mga oxygen tanks sa mga ospital sa nasud.
Matud pa sa gipagawas nga pahayag ni DOH Undersecretary Maria Rosario Vergeire, base sa datos sa DOH ug Department of Trade and Industry (DTI), wala silay nakitang kakulang sa oxygen supply sa nasod bisan sa Metro Manila nga ipaubos sa 2 ka semanang lockdown.
Apil na usab ang uban pang medical supplies sa mga pribado ug pampublikong ospital apil na ang mga gigamit sa pang adlaw-adlaw alang sa nagkalain-laing isyung medikal.
Matud pa ni Vergeire nga sa 580 tons sa oxygen cylinder tanks nga ginahimo matag adlaw, naa sa 560 tons lamang ang nagamit sa matag adlaw nga operasyon sa mga ospital.
Human niini, gisakaan pa sa DOH ang tank requirement sa 600 nga angay himuong oxygen tanks matag adlaw tungod na usab sa hulga sa Coronaviris disease (Covid) ug ang mga variants niini.
Samtang nakig-alayon na ang Philippine National Police (PNP) sa DTI kalabot sa mga taho nga giingong hoarding sa mga oxygen tank ug uban pang medical supplies sa syudad sa Sugbo.
Kalabot niini, nanawagan ang PNP sa publiko nga dili unta ipiton ang suplay sa oxygen tank ug uban pang gamit pang-medikal aron makatabang nga mapaubos ang mga kaso sa Covid sa nasud.