Sinulat ni Elvira Bongosia
Nanawagan ang Bureau of Quarantine (BOQ) sa publiko nga dili mokuha ug ‘yellow card’ kun dili mogawas sa nasud.
“Sa ngayon po ay hindi po natin sila ini-encourage na kumuha ng yellow card kung hindi po gagamitin sa labas ng bansa,” (Sa pagkakaron wala nato giduso nga mukuha ug yellow card kun dili mugawas sa nasud) matud pa sa gipagawas nga pahayag ni BOQ Director Dr. Roberto Salvador Jr.
Matud pa ni Salvador nga sa kadaghang gustong mokuha ug yellow card, nawad-an ug slot ang mga mobyahe padung sa ubang nasud.
Ang International Certificate of Vaccination and Prophylaxis (ICV) o “yellow card” usa ka vaccination card nga may detalye sa mga bakunang nadawat sa usa ka indibidwal.
Matud pa ni Salvador nga giila ang “yellow card” sa 196 ka nasod sukad pa niadtong tuig 1935 apan giklaro niini nga dili kini mandatory sa tanang nasud.
Gi-awhag sa opisyal ang mga mobyahe padung sa ubang nasud nga mokuha ug ‘yellow card’ isip pagmatuod nga bakunado na sa pagbisita sa ilang online booking system sa BOQ.
May bayarang kantidad nga P370 sa pagkuha niini diin P300 niini ang alang sa documentation fee samtang P70 ang alang sa convenience fee.
Matud pa nga kinahanglan lang i-upload ang passport ug vaccination card. Molanat lamang ang proseso sa pagkuha niini ug duha ka oras.
Mahimong moadto sa BOQ sa Port Area sa Manila ug sa mga satellite offices sa BOQ sa Mall of Asia, Batangas, La Union, Laoag, Cebu, Davao ug Cagayan de Oro.
Samtang madugangan ang ilang mga satellite office sa umaabot Setyembre 1 ning tuig.
