Sinulat ni Elvira Bongosia
Tungod sa nagpadayong pagsaka sa mga kaso sa Coronavirus disease (Covid) sa lalawigan, gi-uswag ug laing usa ka semana taman alas 11:59 sa gabii sa Agosto 31 ang border lockdown sa Bohol.
Gipagawas ni Gob. Arthur Yap ang Executive Order No. 40 nga nag-uswag sa pagpasarado sa border sa lalawigan taman Agosto 31, 2021.
“The suspension of air and sea travel of passengers bound for Bohol, excluding domestic air and sea travel of cargoes, shall be extended until Aug. 31,” (Ang suspensyon sa byahe sa dagat ug padulong sa Bohol, gawas sa kargo, gilugwayan hangtud sa Agosto 31, 2021) matud sa nakalatid sa EO 40.
Gilagdaan ni Yap ang bag-ong EO nga nag-uswag sa pagka-epektibo sa EO No. 37 niadtong Agosto 17, 2021.
Ang kasamtangang lockdown matapos unta alas 11:59 sa gabii sa Agosto 20, 2021.
Sama sa niaging border lockdown, wala kini naglakip sa mga domestic air ug sea travel sa mga cargoes ug authorized persons outside residences (APORs), mga health workers on official business, authorized government officials, mga mo-byahe alang sa medical o humanitarian nga mga rason, returning overseas Filipino (ROF) workers, mga indibidwal nga maghatag ug basic services ug public utilities, ug bank personnel ug ubang empleyado sa bangko nga mo-byahe sa lalawigan alang sa pag-replenish ug cash funds ug ubang supplies nga gikinahanglan alang sa padayong serbisyo sa nagkalain-laing bangko.
Ang mga pagawas nga byahe gikan sa Bohol magpadayon apan mag-agad sa entry protocols sa destinasyon nga adtoan.
