Sinulat ni Elvira Bongosia
Dili na i-uswag pa sa Commission on Elections (Comelec) ang voter registration period sa paghuman sa Setyembre 30, 2021 nga deadline nga unang gitakda sa ahensya.
Matud pa sa gipagawas nga pahayag sa tigpamaba sa Comelec nga si Atty. James Jimenez, base kini sa nahimong desisyon sa en banc human nga ikonsidera sa mga miyembro niini ang timeline sa pagpangandam alang 2022 nasudnon ug lokal nga eleksyon.
Gawas niini, gibutyag ni Jimenez nga usa usab sa nahimong hinongdan kun nganong wala gitugotan ang pag-uswag sa deadline sa voter registration mao ang kaluwasan ug panglawas sa publiko ug apil na usab sa ilang mga kawani.
Kahinomdoman nga una niini, pipila ka mga senador ang milagda ug usa ka resolusyon aron ipanawagan sa Comelec ang pagpa-uswag sa voter registration period.
Apan matud pa sa tigpamaba sa Comelec nga gi-aprubahan sa en banc ang pag-uswag sa oras sa voters registration, apil na usab ang pagbukas sa voter registration matag Sabado ug mga holidays, hangtod sa Setyembre 30, 2021.
Sugod niadtong Agosto 25, 2021, magbukas ang mga buhatan sa Comelec gikan alas 8 sa buntag taman alas 7 sa gabii.
Samtang matag adlaw nga Sabado ug holiday, magpabiling abli ang mga buhatan sa Comelec gikan alas 8 sa buntag taman alas 5 sa hapon.
