Sinulat ni Rey Anthony Chiu
Mahimong may kalambigitan sa paggamit sa mga bakuna nga messenger ribonucleic acid (mRNA) sama sa Moderna ug Pfizer-BioNTech sa namatikdan apan talagsaon nga mga kaso sa myocarditis ug pericarditis.
Kini maoy gibutyag sa World Health Organization (WHO), apan kasagaran sa nakasinati niini, maulian ra ug wala nay nagpabilin nga mga simtomas human matambali ug makapahuway.
Ang myocarditis mao ang paghubag sa mga unod sa kasingkasing (heart muscles) samtang ang pericarditis mao ang pagpanghubag sa putos nga nagpalibot sa kasingkasing.
Matud pa sa WHO, ang kasamtangan nga kasayuran nga nakuha, nagtumbok sa potensyal nga kalambigitan sa bakuna ug sa mga simtomas sa sakit sa kasingkasing.
Kalabut sa mga namatikdan nga simtomas nga gimulo sa mga nakakuha sa ikaduhang ptupokan sa bakuna mao ang bag-o lamang apan dili moundang nga sakit sa dughan, mabaw nga gininhawaan ug paspas nga pagpitik sa kasingkasing.
Hinuon, gipasabut sa WHO nga kining mga nakasinati niini, talagsa ra ug madala ra ug tambal ug pahuway.
Ngadto sa mga nakasinati sa nahisgutang mga dili kasarangan nga epekto sa ikaduhang tupokan pipila ka adlaw human matupokan sa ikaduhang tupok sa Pfizer o Moderna, tambag sa WHO, pagpahibaw dayon sa inyong doctor sa labing dali nga panahon.
Gipasalig sa DOH, nga kasagarang nakasinati niining mga simtomas, mauli-an ra ug wala na sila’y mga nagpabiling simtomas nga gimulo.
Niini, matud sa WHO, ang benepisyo ug kaayohan sa mRNA nga bakuna, mas bug-at pa ka sa kakuyaw nga matakdan sa Coronavirus disease.
Tungod niini, aghat pa gihapon sa WHO, magpabakuna, kon kinin a ang imong higayon nga bakunahan.
Sa laing bahin, mahimo usab nga mohangyo nga lahi nga matang sa bakuna ang idapat, sumala pa sa mga health care workers.
Ang importante, magpabakuna dili lamang alang sa kaugalingon nga kaayuhan apan aron usab pagpanalipud sa uban nga dili pwede bakunahan sama sa mga bata ug mga mag delikado ang kahimtang sa lawas, dugang nila.
