Sinulat ni Rey Anthony Chiu
Gipasabot ni Presidential Communications Operations Office (PCOO) Kalihim Martin Andanar ang ‘Duterte Legacy’ sa mga Bol-anon atol sa usa ka radio interview.
Matud pa ni Andanar nga ang ‘Duterte Legacy’ mao ang communication campaign sa gobyerno nga pagpahibalo sa katawhan unsa ang mga nahimo ni Presidente Rodrigo Roa Duterte sa milabay nga 5 ngadto sa 6 ka tuig sa iyang pagdumala sa nasud.
Si Andanar, atol sa programang Balita sa Buntag sa 91.1 Balita FM ubos sa estasyon dyTR nagkanayon nga importante nga ipahibalo ang mga accomplishments o nahimo sa administrasyon ni Presidente Duterte tungod kay nagtakda sila ug sugdanan nga ‘gold standard’ sa communication protocol nga kinahanglang itaho ngadto sa katawhan diin mao usab kini ang legasiya nga ibilin sa administrasyon.
Gibatbat matag usa sa PCOO Kalihim ang mga mahinungdanong nahimo sa administrasyong Duterte sama sa kampanya sa gobyerno batok sa krimen ug ilegal nga droga diin 22,000 na ka barangays sa tibuok nasod ang na-clear.
Nikabat na sa 130 ka Malasakit Centers ang natukod sa tibuok nasod nga naghatag ug libreng serbisyo medikal ug naghatag ug libreng tambal sa katawhan samtang labaw sa 229,000 ka ektarya sa yuta ang nahatag sa mga kabos nga mag-uuma.
Mga usa ka milyong mag-uuma usab nga nanag-iya ug 10 ka ektarya ug ubos pa niini ang nakapahimos sa libreng irigasyon samtang ubos sa “Build, Build, Build” program, 29,000 ka kilometro sa kadalanan, 451 ka pantalan ug 214 airports ang nakumpleto sa administrasyon.
“For example, kanang inyong Bohol Panglao International Airport (BPIA), wala man na gadagan kadtong niaging administrasyon pero karon pagsulod ni Presidente Duterte gipaspasan diretso mao nga nahuman na,” pasabot pa ni Andanar.
Napalabang usab ubos sa Duterte administration ang Free Tuition Act alang sa mga kabos nga estudyante nga gustong makalampos sa mga state universities ug colleges.
