Sinulat ni Elvira Bongosia
Bisan daghan nang nabakunahan batok sa Coronavirus disease (Covid) dili dayon makita ang epekto niini, matud pa sa Department of Health (DOH).
Matud pa ni DOH Epidemiology Bureau director Dr. Alethea De Guzman, makita ang epekto sa bakuna human ang unom ka semana.
“I call vaccination a long play,” (Matawag nato amg pagpamakuna nga dugay ang epekto), matud pa ni De Guzman sa usa ka forum.
Dugang pa niini nga makonsidera lamang nga fully vaccinated na ang usa ka indibidwal, duha ka semana human makadawat sa ikaduhang dose sa two-dose vaccine o duha ka semana human mabakunahan ug single-shot vaccine.
Matud pa sa eksperto nga sa Nobyembre pa makita ang epekto sa halapad nga pagbakuna sa nasud.
Gidugang pa niini nga makapaabot kita ug pag-ubos sa ‘case projections’ mga buwan sa Nobyembre.
“The earlier we ramp up our vaccination efforts, the earlier we will perceive benefits in terms of case reduction and decrease in hospitalization,” (Kun sayo pagpasakasa pagpamakuna, labing sayo makita nato ang epekto niini diin mukunhod ang mga kaso ug dili na daghan ang ma-ospital), pasabot pa ni De Guzman.
Sa kapin 30 milyong indibidwal nga nabakunahan, 13 milyon niini ang kumpleto-bakunado na batok Covid.
