ni: Jes B. Tirol
Kangurulsol 5, 2021
Pabúos Sa Bandilang Pilipinhon
(Salute to the Filipino Flag)
Pasiuna
Sa panagtigom sa mga Masoneriya (Freemasonry) adunay dayhag (ritual) nga pagpabúos sa Bandilang Pilipinhon. Ato kining gihubad sa Binisayâ gikan sa lawom nga Ininglis, busa atong mapaabot nga lawom usab ang sangpotanan nga Binisayâ. Ania ang hubad sa Binisaya.
Pabúos Sa Bandilang Pilipinhon
Unang Bahin
Ang bandila nga gihiklad sa inyong atubangan naghulagway sa nasodnong paganti sa atong násod – ang Pilipinas.
Timailhan kini sa mga tawo nga nagkahiúsa diin ang matag tipik natigman sa kinatibuk- an, kabutang sa ginsakopan nga walâ mawatás-watás – usa ka republika, makiangayon, gawasnon ug may kaugalingnan.
Ilhanan kini sa atong nasodnong kagawasán, ang unod ug nindanag sa tanan nga bililhon ug hamili sa kinabuhing Pilipinhon.
Mugnà sa gamhanang kamot nga walay kúpas, gihimúgsò sa mga tawo nga mahi-gugmaon sa kagawasán ug gitultolan sa diwa sa kapalaran sa mga nasod.
Mao kini ang ulot sa atong nasodnong kabilin ug ang buhing tail sa atong natawhang katungod.
Sa iyang ngalan nahitála ang kasaysayan sa katukoran ug paggambalay sa atong nasod.
Ang iyang kasibot molungtad hangtod sa kataposan sa panahon ug ang iyang mga míthì mokutát lamang kon mahánaw na ang mga nasod ug mga láhì.
Ang iyang Adlaw mao ang timailhan sa kinabuhing dayon sa atong nasod ug usa ka tail sa makanunayong kinabuhi nga nagabantay sa kapalaran sa atong kaliwatan.
Ang walo ka mga bidlisiw naghulagway sa unang waló ka ginsakópang lalawigan na mao ang Manila, Cavite, Bulacan, Pampanga, Nueva Ecija, Bataan, Laguna, ug Batangas nga gilayon nialsa sa pakiggubat; ang tulo ka mga bitúon nagtúmbok sa tulo ka mga dagkong búngto; ang Luzon, Bisayas, ug Mindanao, naátò tungod sa gasa sa kinaiyahan ug pagbuot sa makagagahom sangatanan.
Ang putî nga bíl-id nagtug-an kanáto sa atong malinawon ug mahigalaon nga katuyoan og ingon man sa katím-os ug kapútli sa atong mga lihok, ang mala-Mason nga binagútlo nga mao ang Pagtúo, Paglaom, ug Kaághop.
Ang bughaw nga wanang nagkahulogán sa atong pagkamakinasódnon ug ang atong nangawankawan nga mga tamdanan ug katuyóan.
Ang pula nga lapák nagmantala sa atong dimabangbang nga pulóg nga atong kinubtanan sa kaalindangkan nga langit.
Sa kinatibuk-an, ang adlaw, ang bil-id, ug ang tulo ka mga bitúon nga nahimutang sa atong bandila, mga tail kini sa Mason – ang panag-igsuonay sa tawo ubos sa pagkaamahan sa atong Gino-o.
Ug pinasikad sa mga damgo sa atong katigulangan, hinaot untà nga magpadayon kini pagkayab hangtod sa hangtod ibabaw sa yutà sa malipayong katawhan.
(Tapos ang Unang Bahin)
Ika-Duhang Bahin
Anaa nagkayab ang atong bandilâ, timailhan sa talagsaón nga kaanyag ug makinasódnon nga kahulogán.
Ang makanunayon nga nindanag sa atong katawhan alang sa kinabuhi sa kalinaw, kaugalingnan, ug kagawasan.
Pabúos ngadto kaniya tungod kay kini ang taíl sa kalipay ug pagmayâ sa atong mga ginikanan ug mga bayani sa mga siglo nga nanglabay na;
Hagki siya tungod kay kini ang pagánti sa mga maisog-anak sa atong mga Raha Sulayman ug mga Maria Clara;
Itapión siya sa imong dughan tungod kay kini ang balaanong bandilâ sa atong nasod – ang Pilipinas;
Ipahilúna siya sa inyong kasingkasing tungod kay kini ang tail sa atong nasod nga kanunay nangibabaw kanatong tanan sa panahon sa mga kabalisong sa kinabuhi.
Higugmáa siya tungod kay kini ang bunga sa mga pagpasakit sa atong mga kaigsuonan ug mga bayani nga nangapúkan alang sa paglaban sa atong nasodnong katungod;
Halari siya tungod kay kini ang buhing panig-ingnan sa diwà sa atong yutawhan.
Tahóra siya tungod kay kini ang bubing pandong nga naglímin sa madugoon ug nabitás- bitás nga patayng lawas sa atong mga bayani,
Panalangini siya ug ipahinungod sa Gino-o tungod kay kini ang bunga sa mga pagpasakit sa atong kaigsuonan ug mga bayani nga namahúlay na karon sa kinabuhing dayon;
Ug isalig siya sa Makagagahom Sangatanan ug sa tawhanong kaangayan nga untà matipigan kini alang kanátò, sa atong mga anak, ug sa anak sa atong mga anak. aron paghimayà ug pagbalaan niadtong nangamatay alang kaniya aron dili makawang ang ilang kamatayon.
Mga hubad pulong:
bidlisiw – ray; beam of light
Bil-id -equilateral triangle
binagútlo – trinity; triad
Búngto -region; a portion of territory
gihiklad – spread out; unfurled
hamili – noble; august; worthy
kaalindangkan – tropical region
kabalisong – changes in form, culture, practices, etc.
kabútang – matter, that which occupies space
kasibot – ineterest or concern about something
láhi – race; kindred
lapák – contrast in color; sewn stripes in flag
mithi – virtue, ideal
mokutát – will dry-up; will decrease
mugna- create; found; establish
nindanag – magnificence; quality of being magnificent
pabúos – salute; toast in honor of
paganti – banner; ensign
pulóg – energy; force; vigor
tail – symbol; mark; seal
timailhan – marker; identifying mark
Ulot -boundary: limit; border
wanang – wide space or area