Sinulat ni Rey Anthony Chiu
Gimandu-an ni Gobernador Arthur Yap ang mga sakop sa pwersa sa kapolisan ug mga opisyales sa barangay sa estrikto nga pagpatuman sa mga gihan-ay nga mga protocols aron mapanalipdan sa sakit ug kapugngan ang pagdagsang sa Coronavirus disease (Covid) sa labing bag-ong gipagawas nga Executive Order No. 42, series of 2021 (EO 42).
Dinhi, gilibkas na usab ang pagpugong sa pagpasulod sa mga tawo dinhi sa Bohol sakay sa eroplano ug barko sugod niadtong Sept. 1, 2021 sa may alas 12:01 sa kadlawon, samtang ipatuman ang partial nga pagpugong sa pag-inum sa ilimnong makahubog, sanglit kini kasagaran dugokon sa mga tawo.
Hinuon, wala pa maghisgut ang bag-ong EO kabahin sa pagpugong sa ubang matang sa tapoktapok o pagpatapok sa mga tawo nga gidudahang maoy nahimong super-spreaders sa sakit.
Sa labing bag-o nga EO 42 nga giluwatan ni Gob Arthur Yap niadtong Agosto 30, 2021, dili lamang mga Authorized Persons Outside Residence (APOR) ang makasulod sa Bohol apan lakip na ang mga manguli-ay ug mga bisita (dili APOR) nga mahimong mosuroy nganhi.
Hinuon, kadtong mosulod sa Bohol, gikinahanglan gihapon nga magduso ug negatibo nga resulta sa real time-polymerase chain reaction (RT-PCR) nga ang swab gikuha 72 oras sa wala pa mobyahe paingon sa Bohol.
Sa pag-abut sa Bohol, ang mosulod, ipailawom sa 5 ka adlaw nga kwarantina, segun sa EO.
Sa kwarantina, kini mahimo sa gitagana nga temporary monitoring and treatment facility sa local nga kagamhanan, sa hotel quarantine kon kini aprobado ug accredited sa Department of Tourism o sa balay kon kini may lawak nga may kaugalingon nga kaliguan ug kasilyas ug aprobado sa mga tinugyanan sa kasanihan sa lungsod.
Human sa lima ka adlaw, ang mingsulod sa Bohol nga gikwarantina, ipailawon sa lain na usab nga RT-PCR ug kung kini magnegatibo sa Coronavirus disease (Covid), mahimo na siya nga buhian sa kwarantina ug makauban na sa iyang banay o tuyo sa Bohol.
Apan, segun sa EO 42, kon magpositibo siya sa Covid, magpabilin siya nga ikwarantina hangtud nga ang resulta sa mga mosunod nga RT-PCR human sa laing lima ka adlaw, magnegatibo na.
Subay sa nasampit nga EO, padayon usab gihapon nga epektibo ang pagpatuman sa estrikto nga border control sa tanang ports of entry samtang epektibo pa gihapon usab ang mga silot nga ipahamtang sa mga makasupak niini.
Ug sanglit ang pagtinir ug ilimnong makahubog sarang tapokan gayud sa mga katawhan, subay sa nahauna nga EO No. 17, gidili na sa balaod ang pagbaligya, paghatag, pagtanyag, pagpalit, ug pagdalit sa ilimnong makahubog dinhi sa lalawigan.
Hinuon, kon ang gipalit nga ilimnong makahubog adto ra tagayon sa balay o sa mga pribadong dapit, imnon sa mga parehas nga naa sa usa ka panimalay lamang, kini tugotan.
Gitataw usab sa bag-ong EO nga gidid-an ang taga laing panimalay nga modayo ug makigtagay gawas sa ilang mga panimalay.
Gidili usab sa usa ka hubog o nakainom na nga mogawas sa panimalay ug moadto sa nga pangpubliko nga lugar.
