Sinulat ni Rey Anthony Chiu
Sa 2.24 porsyento, mas daghan ang average sa mamatay sa Coronavirus disease (Covid) dinhi sa Bohol kon itandi sa average nga kadaghanon sa mga mamatay sa sama nga sakit sa kinatibuk-ang Pilipinas.
Kini usab nagpasabut nga sa matag 1000 ka tawo nga masakit sa Covid sa Bohol, kapin sa 22 niini ang mamatay.
Sa laing bahin, sa kinatibuk-ang nasud, ang average sa mga mamatay tungod sa Covid, anaa lamang sa 1.64%.
Sa laktud nga pagkasulti, sa matag 1000 nga Pinoy nga masakit, naa ra sa kapin sa 16 ang mamatay.
Sa inadlaw nga Covid tracker nga gipagawas sa Bohol Inter-Agency Task Force (BIATF) niadtong Sept. 7, 2021, napakita nga miabut na sa 14, 323 ang kadaghanon sa mga Bol-anon nga kompirmado pinaagi sa real time-polymerasechain reaction (PCR) nga nasakit ug Covid.
Niini nga kadaghanon, hangtud sa Sept 7, 2021, 322 na ang walay swerte nga namatay.
Sa laing bahin, sa nasudnong hulagway, mikabat na sa 2,080,984 ang kadaghanon sa Pilipino nga kompirmadong nasakit sa COVID-19.
Niini nga kadaghanon, miabut na usab sa 34,234 ang nangamatay.
Dinhi nakuha ang 16.4 nga average sa nangamatay sa nasud sa matag usa ka libo nga masakit.
Hinuon, bisan pa man sa nagpanghitabo, sa kinatibuk-an nga 14,234 ka mga Bol-anon nga kompirmadong nasakit sa COVID, 84.131% na niini o 12,051 ang nanga-ayo na sa ilang mga gibati.
Ang Bohol aduna nay nataho nga 144,872 ka tawo nga nakakuha nag kompleto nga dose sa bakuna pangontra sa sakit, apan pipila niini nagpaabut pa sa 14 ka adlaw gikan sa ilang katapusang tupokan aron may piho nan ga panalipod.
Sa tibuok nasud, mikabat na sa 31,950,423 ang nakakuha sa ikaduhang tupokan sa bakuna.
Matud sa katapusang ihap sa populasyon, naan a sa 109,581,078 ka Pinoy nga ania sa nasud.
Niini nga kadaghanon, anaa na sa 29.15% ang nabakunahan ug sa dili madugay, kon tinuod man ugaling, mapamatud-an nan ga sa 30% sa populasyon nga mabakunahan, mopatag na ang graph sa mga bag-ong nasakit ug mamatay.
Tumong sa nasudnong kagamhanan ang ipaabut sa 70% sa populasyon sa nasud ang bakunahan aron mabuntog na ang sakit.
