Sinulat ni Dave Albarado
Giklaro ni city councilor Augustinus “Dodong” Gonzaga nga nahipno ug wala nay makapugong kanila uban ni Vice Mayor Jose Antonio “Toto” Veloso nga molansad sa pagka mayor ug bise mayor sa Tagbilaran sa 2022 elections.
Mao kini ang gipadayag ni Gonzaga atol sa interview sa Newsmakers ug Uban Pa niadtong Sept. 10, 2021, nga gidumala nila Ardy Araneta-Batoy ug Chandymar Araneta-Batoy.
Sa pagpadayag ni Gonzaga sa paglansar sa sunod tuig isip ka tandem ni Veloso, ilang makabangga ang tandem ni First Lady Jane Yap ug si Konsehal Adam Jala alang sa pagka mayor ug bise mayor.
Sila si Jane Yap ug Adam Jala naka alyado sa Padayon Bol-anon nga diin apil sa mga dako dako sila si Vice Gov. Rene Relampagos ug ni Cong. Edgar Chatto.
Si Relampagos ang bayaw ni Gonzaga ug si Chatto maoy bayaw ni Veloso.
Sa laing pakighinabi, miingon si Gonzaga nga wala mag depende kang Relampagos ug Chatto ang ilang desisyon nga mulansar sa sunod tuig.
Sa pagkakaron hipno na ang Toto-Dodong tandem o ToDo, hinoon wala pa gibutyag ni Gonzaga ang ilang line-up kay aduna pa silay mga gihimo nga mga konsultasyon.
Mitug-an si Gonzaga nga apil sa line-up nila ni Veloso si Konsehal Jonas Cacho ug ang punong barangay sa Poblacion 1 nga si Arlene Karaan.
