ni: Jes B. Tirol
Kangurulsol 12, 2021
GUSOS O MGA PAGDAYEG KANG MARIA SANTISIMA SA KASILAK
Pasiuna
Sa Kangurulsol 8 (Sept. 8) mao ang kapistahan sa Birhen Sa Kasilak nga mao ang Patrona sa Lungsod sa Loon, Bohol. Alang sa paghalad sa maong kapistahan, atong tukibon ang usa ka guso (a religious poem) nga napatik sa tuig 1905 didto sa Imprenta De San Carlos, Cebu. Tingali diyutay na lang ang naggamit niining maong gúso.
Pahimangnò: Atong gisalimuad (modify) ang mga pagtitik (spelling) aron mohaom sa binag-o nga pamaagi.
Pangunahan (P): Batubaláni sa gugma, sa mga tawo pinalángga;
Tubag (T): Imo kami pagtaronga, kanamò ang grasya dangáta.
(P): Bituon ka man sa dagat, niining lungsod Kasilak, Kalipay sa Diyos gitawag, dalangpan sa nagahilák Kay ikaw ang mananambal, sa kanimo manghitungha,
(T): Imo kami pagtaronga, kanamò ang grasya dangáta.
(P): Si Eba kang ikaduha, sa nahaunang batukan, Sa kinabuhi ka lamang, sa kamatayon man siya, Gitawag ka nga Inahan, sa walay pagduhaduha,
(T): Imo kami pagtaronga, kanamò ang grasya dangáta.
(P): Imo kaming ipaila, sa imong Diyosnon nga bátà, Ipakita mo kaniya, kining among mga hátag, Itunol sa kamot niya, ang among pag-ampo ug luha,
(T): Imo kami pagtaronga, kanamò ang grasya dangáta.
(P): Kami ang makasasala, ug sa salâ man gihigtan, Hubari kami ug tangtangan, ning kabug-at nga walay sama, Kay ikaw lamang, Senyora, ang among gikalaoman,
(T): Imo kami pagtaronga, kanamò ang grasya dangáta.
(P): Sa imong mahal nga pag-anak, kanimo walay nagsama, Sa babaye ngatanan, ikaw da ang hinigugma, Kay sa Diyos man nga gihúptan, ang pagka-ulay mong palaran.
(T): Imo kami pagtaronga, kanamò ang grasya dangáta.
(P): Lamdagan mo ug silakan, kining among hunahúnà, Tudloan kami sa dalan, nga gilaktan nimo una, Aron sa kahimayaan, kitang tanan masig-uban,
(T): Imo kami pagtaronga, kanamò ang grasya dangáta.
(P): Sa Santisima Trinidad, halaran ka ug simbáhan, Anak ikaw sa Amahan, Inahan usab sa Anak, Asawa ka nga maanyag, sa Paraklito (Holy Spirit) ilang gugma,
(T): Imo kami pagtaronga, kanamò ang grasya dangáta.
(P): Batubaláni sa gugma, sa mga tawo pinalánggà.
(T): Imo kami pagtaronga, kanamò ang grasya dangáta.
Timang (Comment) Kining maong guso mao kini ang unang gabii sa Novena sa Nuestra Señora sa Kasilak. Wala na nátò iapil ang ubang walo (8) ka mga gabii kay aduna na may mga pagmaymay ug dili na masulod sa atong lindog.