Sinulat ni Elvira Bongosia
Nihatag ug katin-awan ang Department of Health (DOH) kalabot sa nikatap nga post sa social media nga nag-ingon nga dili epektibo ang real time-polymerase chain reaction (RT-PCR) test sa pagtumbok sa SARS-CoV-2 base sa mga spike protein gikan sa sample sa usa ka indibidwal.
Giklaro sa DOH nga nagpabiling ‘gold standard’ sa pagtumbok kun positbo ang usa ka tawo sa Coronavirus disease (Covid).
Gidugang pa niini nga ang RT-PCR test gigamit aron ma-detect ang genetic material sa Covid virus.
Ang resulta sa test kinahanglang makuting matakdo base sa sintomas sa usa ka pasyente aron maseguro nga ma-diagnose sa Covid.
Gitumbok usab sa departamento nga ang mga healthcare workers o professionals sa mga laboratory sa Pilipinas adunay igong kahibalo ug kahanas aron siguradohon ang kalidad sa mga resulta gikan sa maong test.
Subling gipahinumdoman sa DOH ang publiko nga kanunay e-beripika ang mga impormasyon nga makita online sa mga lehitimong tinubdan lamang.
