Sinulat ni Elvira Bongosia
Gi-uswag sa Department of Education (DepEd) ang deadline sa enrollment alang sa mga pampublikong tunghaan.
Imbes nga Setyembre 13, mahimo pang magpatala ang mga estudyante nga wala pa nakapa-enroll hangtod sa katapusan ning buwan o taman Setyembre 30, 2021.
Sa usa ka pahayag, miingon si DepEd Undersecretary Revsee Escobedo nga may gipagawas na silang memorandum kalabot niini human sa gihimong panagpulong sa executive committee sa buhatan.
Naglaum ang DepEd nga sa katapusan ning buwan sa Setyembre, mas malabwan pa ang gidaghanon sa enrolment sa School Year 2020-2021.
“Umaasa tayo na sa buwan na ito, mahihigitan natin ang numero ng enrollment natin noong School Year 2020 to 2021,” (Naglaum nga kining bulana, malabwan nato ang gidaghanon sa enrollment sa 2020 to 2021.) matud pa ni Escobedo.
Sukad Setyembre 13, 2021 nikabat na sa kapin 24.6 milyon ang gidaghanon sa mga naka-enroll o 93.8% sa 26.2 milyon nga mga estudyanteng na-enroll sa nakalabay nga school year, base sa datos sa DepEd.
Nagpabiling gipaubos sa remote learning o flexible learning arrangement ang mga tunghaan sa Pilipinas tungod sa hulga sa Coronavirus disease (Covid).
