Sinulat ni Rey Anthony Chiu
Samtang nagpaabut sa mga bakuna nga moabut pa, kapin na sa upat ka kinabuhi ang kuhaon sa Coronavirus disease (Covid) matag adlaw.
Taliwala sa kawalay laing kapadulngan sa mga taga Bohol apan maghuwat na lamang sa bakuna nga moabut, miabut na sa upat ang mamatay matag adlaw dinhi sa Bohol sa milabay nga duha ka semana.
Sa sulod sa usa ka buwan pananglitan, gikan sa Agosto 12, 2021, ngadto sa Septembre 10, 2021, natala sa Bohol ang 113 ka mga kamatayon, mga kinabuhi nga gikahadlokang nadamay sa Delta variant nga nagpadaghan sa kaso sa mga nangamatay dinhi.
Sa 113 ka mga nangamatay, kong bahinon sa 30 ka adlaw, moabut na sa 3.7 ang mamatay matag adlaw gamit kining datus.
Subay sa kasayuran nga gipaambit sa Bohol Inter Agency task Force (BIATF) 36 ka Bol-anon ang namatay sa Covid gikan sa Agusto 12, 2021 ngadto sa Agosto 26, 2021, samtang sa sunod nga 15 ka mga adlaw, misapong sa 73 ka Boholanos ang namatay usab tungod sa Covid.
Kong ang inadlaw nga average sa mga nangamatay sa Covid dinhi sa Bohol sa una nga 15 ka adlaw miabut sa 2.4 o 2 sa matag 100 ka pasyente sa Covid, mikamang ngadto sa makahahadlok ang kadaghanon sa mamamtay sa sunod nga mga semana.
Gikan sa Agusto 27, 2021, ngadto sa September 11, 2021, natala sa Bohol ang 73 ka kamatayon, o 4.5 ka tawo ang mamatay sa matag 100 ka pasyente sa usa ka adlaw.
Samtang ingon niini ang nahitabo, padayon pa gihapon nga nangaghat ang mga opisyales sa pagpabakuna kong ila na nga higayon aron kubsan ang pagpangamatay.
Sa laing taho, halos 80% sa mga nangamatay sa Bohol tungod sa Covid nag-edad ug 50 anyos pataas.
Kadaghanan sa mga nabiktima, wala pay bakuna ni bisan ka usa.
Sa laing bahin segun sa taho, wala pay namatay nga nakadawat sa kompleto nga panalipod batok sa Covid pinaagi sa duha ka tupokan sa bakuna.
Hinuon, gikataho usab nga nagnihit na usab ang bakuna nga miabut sa Bohol.
Niadtong Septembre 8, 2021, pananglitan, gikataho nga mikabat pa lamang sa 391,922 ka bakuna ang nakaabut sa Bohol, kang kinsa nga target nga bakunahan, moabut sa dul-an sa usa ka milyon.
Hangtud sa sama nga petsa, 149,782 pa ang nakakompleto sa ilang duha ka bakunahan.
Samtang diha nay huhungihong nga may giandam ang mga local nga kagamhanan nga pundo alang sa ilang pagpalit sa mga bakuna, gawas sa libre nga ihatag sa nasudnong kagamhanan, wala na usab balita kong gipadayon ba kini, alang sa mas paspas nga pamakuna.
