Sinulat ni Elvira Bongosia
Gihimakak sa Department of Health (DOH) ang nikatap nga bidyo nga nag-ingon nga may sulod nga nanobots ang bakuna ug bag-ohon niini ang genetic code sa DNA sa usa ka tawo.
Subling giklaro sa DOH nga ang tanang mga bakuna batok sa coronavirus disease (Covid) nga gigamit sa nasod adunay Emergency Use Authorization (EUA) nga nagpamatuod nga luwas ug epektibo kini batok sa Covid.
Gipasalig sa departamento nga niagi sa makuting proseso ug pagtuon sa mga eksperto ang tanang mga bakuna ug wala kini sulod o sagol nga magnets ug nanobot chips o bisan unsang manipulasyon o butang nga makapabag-o sa genetic code o DNA sa usa ka tawo.
Gani, tudluan sa bakuna ang lawas sa tawo nga mohimo ug antibodies aron palig-onon ang resistensya niini batok sa Covid.
Gipahinumdoman sa DOH ang publiko nga kanunay e-beripika ang mga impormasyon nga makita online sa mga lehitimong tinubdan lamang.
