Sinulat ni Elvira Bongosia
Giseguro sa Department of Education (DepEd) nga gipaayo ug de-kalidad nga ang self-learning modules (SLM) alang sa kapin 26 milyong estudyante karong School Year 2021 – 2022.
“Marami tayong adjustments at talaga pong ang purpose natin ay mas maging mabuti ang kalidad ng mga self-learning materials,” (daghan ta ug adjustments ug ang atong tuyo mahimong maayo ang kalidad sa atong self-learning modules.) matud pa ni DepEd Undersecretary for Curriculum and Instruction Diosdado San Antonio.
Matud pa ni San Antonio nga gitarong na ang quality assurance process sa mga modules sugod pa niadtong Enero, gawas pa sa pakig-alayon nila sa Philippine Normal University aron masusi ug maayo ang mga materyales.
Giingong gihimoan nila ug paagi aron masiguro nga “better version” sa self-learning modules ang himuon sa mga bata diin nagpahigayon pa ang DepEd ug 2nd round sa quality assurance sa mga self-learning modules.
Gipahibalo sa DepEd nga mahimo pa gihapong isumbong sa publiko ang mga sayop sa mga self-learning modules pinaagi sa DepEd Error Watch, usa ka inisyatibang gilusad niadtong Oktubre 2020 aron matubag ang mga isyu.
Gidugang pa ni San Antonio nga niubos pa ug maayo ang gidaghanon sa mga napatik nga mga sayop sa modules sugod niadtong Enero hangtod niadtong Hulyo, kun itandi sa kapin 100 ka sayop nga nakumpirmar niadtong Oktubre hangtod Disyembre.
Samtang giseguro usab ni DepEd Kalihim Leonor Briones nga nakat-on na silang mag-adjust sa ‘new normal education’ ug dili na mausab ang mga nahitabo sa milabay nga school year.
“I’d like to assure everyone that this will not be a repeat of last year because events don’t necessarily repeat themselves,” (Akong pasaligan ang tanan nga dili na mausab nahitabo sa miaging tuig kay ang mga panghitabo dili mausab ug iyaha.) pasalig pa ni Briones.
