Sinulat ni Elvira Bongosia
Subling nanawagan ang Provincial Field Office sa Philippine Coconut Authority (PCA) sa Bohol sa mga mag-uuma ug lubi sa lalawigan sa pagparehistro sa ilang kaugalingon sa National Coconut Farmers Registry System (NCFRS).
Matud pa ni PCA-Bohol Manager Emiliano Romero nga ang deadline sa pagparehistro taman lamang karong Setyembre 30, 2021 ug wala na nihatag ug lugway ang nasudnong buhatan sa PCA.
Base sa Republic Act 11524 o mas giila sa An Act Creating the Coconut Farmers and Industry Trust Fund, ang mga gitugotan sa pagparehistro mao ang mga tag-iya sa umahan sa lubi, tigpananom ug lubi, nag-abang, tenant-worker ug worker-laborer.
Matud pa ni Romero nga mahimo silang magparehistro online pinaagi sa link nga bit.ly/ncfrscocolevy diin may gikinahanglan lamang nga mga dokumento nga e-attach.
Kinahanglang sulatan ang NCFRS form nga mahimong ma-download pinaagi sa link nga bit.ly/ncfrscocolevy ug e-submit ang accomplished form kauban sa mga supporting documents ngadto sa ncfrs@pca.gov.ph o sa pinakaduol nga buhatan sa PCA sa ilang lugar.
Bukas ang mga provincial ug regional nga buhatan sa PCA gikan Lunes taman Biyernes gikan alas 8 sa buntag taman alas 5 sa hapon.
Si Romero nagkanayon nga bukas ang ilang buhatan nga nahimutang sa dalan R. Enerio duol sa Land Transportation Office sa barangay Dampas, ning syudad sa Tagbilaran sa pagtabang sa mga mag-uuma sa ilang pagparehistro.
Matud pa sa PCA-Bohol Manager nga kadtong mga mag-uuma ug lubi nga gustong magpatabang sa ilang buhatan sa pagparehistro kinahanglang magdala sa orihinal ug photocopy (atubangan ug likod) sa bisan unsa sa mga mosunod nga valid government ID: national ID, SSS ID, PRC ID, TIN card, passport, senior citizen’s ID, barangay ID, Department of Labor and Employment (DOLE) card, voter’s ID, postal ID, school ID, Unified Multi-Purpose ID (UMID) o Overseas Workers Welfare Administration (OWWA) ID.
Alang sa mga tag-iya sa umahan ug lubi, kinahanglang magdala ug bisan unsa sa mga mosunod: certificate of land transfer, emancipation patent (EP), individual certificate of land ownership award (CLOA), collective CLOA, co-ownership CLOA, agricultural sales patent, homestead patent, certificate of title o regular title, certificate of ancestral domain title, certificate of ancestral land title, tax declaration, extrajudicial partition, deed of sale, ug free patent.
Alang sa coconut farming tenants, kinahanglang magdala bisan asa sa mga mosunod: lease holding agreement of certification nga nagpakita sa kasabotan tali sa farmer owner, ug photocopy sa farm owner’s valid ID; samtang alang sa coconut farm workers ug laborers, kinahanglan lamang ang mga mosunod: certification nga nagpakita ug kasabotan sa farm owner o tenant alang sa work o labor sa farm ug photocopy sa farm owner’s valid ID.
Ang mga rehistradong mag-uuma sa lubi makapahimos sa daghang benepisyo sama sa: hybridization; mga pagbansay mga mag-uuma; research, marketing ug promotion; crop insurance; pag-ugmad sa mga umahan; shared facilities alang sa processing; organizing ug empowerment sa coconut farmers organization (CFOs) ug cooperatives; credit program; infrastructure development; scholarship program; ug health ug medical programs.
