Sinulat ni Rey Anthony Chiu

Sa matag napulo ka tawo nga namatay sa coronavirus disease (Covid) dinhi sa Bohol, siyam niini kadtong mga wala pay bakuna o nagdumuli nga mabakunahan, samtang ang nahibilin, nabakunahan apan dili kompleto nga duha ka tupokan.

Kini maoy kamatuoran nga napagawas gikan sa Bohol Inter Agency task Force 

(BIATF) sa taho niining gipagawas Sept. 27, 2021.

Ug ngani, sa mga bag-ong nataho nga natakdan sa Covid sugod sa Sept. 21, 2021,  ngadto sa Sept. 27, 2021, sa 1,101 ka mga kaso nga natala sa usa  ka semana, 61 porsyento o sobra sa katunga sa mga bag-ong natakdan, mga wala mabakunahi o nagdumili sa pagpabakuna.

Laing 35 porsyento sa mga natakdan ang may kompleto na sa bakuna apan wala na mahadlok pa nga  maangin tungod kay may kompleto na sila nga panalipod sa lawas.

Sa susama nga datus, 2% ang natakdan niining bag-o lamang nga semana ang natupokan sa unang dose apan wala pay hingpit nga proteksyon sa sakit nga mananakod nga dala sa Coronavirus.

Gani, matud sa mga eksperto, bisan kadtong nakakuha nag duha  ka tupokan sa bakuna nga batok sa Covid, kinahanglan pa gihapon sila nga mag-amping ilabi na sa sulod sa unang duha  ka semana human sa ikaduhang tupok.

Kini tungod kay sa akto nga matupokan sa ika duha nga dose, mahimong ang lawas sa tawo, mapahimutang sa labing ubos nga proteksyon batok sa sakit.

Kini tungod kay ang mga antibodies sa lawas o mga sundawo sa lawas, nagkamolo pa ug atiman sa epekto sa bakuna mao nga ang isan gamay nga impeksyon sa lawas, mahimo na nga dili niini matubag.

Sa Sept. 25, 2021 ga taho sa Provincial Health Office, diin usab nagbase ang Bohol provincial Vaccination Operations Center, mikabat na sa 182,125 ka Bol-anon ang nakakuha sa kompleto nga proteksyon batok sa Covid.

Kini anaa pa sa 13% sa kinatibuk-ang target sa Bohol nga abto ang 70% sa kinatubuk-ang populasyon niini.

Sa sama nga taho, aduna nay 175,998 ka mga Bol-anon nga natupokan sa unang dosage sa bakuna, mao nga miabut na sa 358,125 ang mga nakakuha sa una ug kompleto nga dosage sa panalipod batok sa Covid.

Sa kasamtangan, may 961,871 na ka bakuna ang nadawat sa Bohol gikan sa nasudnong kagamhanan, apan nanginahanglan kini ug 1,952,060 ka doses sa bakuna aron makab-ot na sa Bohol ang gilantaw nga herd immunity.