Sinulat ni Elvira Bongosia
Gi-anunsyo ni Presidente Rodrigo Roa Duterte nga mahimong dili na mogamit ug face shield kun naa sa open area.
Sa iyang ikaduhang Talk to the People niadtong Miyerkules sa gabii, Sept. 22, 2021, miingon ang pangulo nga iyang gisunod ang tambag sa mga government experts.
Matud pa ni Duterte nga ang face shield requirement alang na lamang sa 3C category nga mao ang crowded, closed ug close contact.
“No more face shields outside… Ang face shield, gamitin mo lang sa 3Cs: closed facility, hospital, basta magkadikit-dikit, crowded room, tapos close-contact. So diyan, applicable pa rin ang face shield,” matud pa ni Duterte.
(Dili na gamiton ang face shield sa gawas. Ang face shield gamiton lang sa 3C, closed facility, hospital, mga duol nga interaksyon, crowded room, dayon close-contact. Diha, magamit ang face shield.)
Matud pa sa pangulo nga gimando niya dayon ang implementasyon sa guidelines kalabot niini.
Kahinumdoman nga unang gilimitahan sa Presidente niadtong Hunyo ang paggamit sa face shield kun ang usa ka tawo naa sa tambalanan apan human ang pila ka adlaw, gibawi kini ug gimanduan ang katawhan sa pagsuot ug shield kun naa sila sa sulod ug gawas.
Gipasabot kaniadto sa pangulo nga nahadlok siya sa pagdaghan sa Delta variant sa Coronavirus disease (Covid) mao nga gimando niya pagbalik ang paggamit ug face shields.
