Sinulat ni Elvira Bongosia
Giklaro sa Bangko Sentral ng Pilipinas (BSP) nga ang 20-peso New Generation Currency (NGC) nga salaping papel nagpabilin isip legal tender ug magamit gihapon kauban sa 20-peso NGC nga sensilyo alang sa inadlaw-adlaw nga mga transaksyon.
Matud pa sa BSP nga ang 20-Peso NGC banknotes anam-anam nga wagtangon gikan sa sirkulasyon pinaagi sa natural attrition o hangtod ang 20-Peso nga salaping papel dili na angay gamiton sa sirkulasyon.
Kalabot niini, ang BSP nipagawas usab ug advisory sa mga bangko alang sa pag-promote sa distribution, recirculation, ug mobilization sa 20-peso nga mga sensilyo.
Kahinumdoman nga ang BSP nipagawas sa bag-ong 20-peso NGC nga sensilyo niadtong Dis. 17, 2019.
Sa bi-color 20-peso nga sensilyo, gipabilin ang kinalabwan nga mga elemento sa P20 nga salaping papel. Sa kilid nga nawong sa sensilyo makita si Manuel L. Quezon, samtang sa pikas kilid makita ang BSP logo, ang Malacañan Palace, ug ang Nilad nga tanom.
Gi-awhag sa BSP ang publiko nga gamiton ug husto ug e-recirculate ang mga sensilyo alang sa ilang ekonomikanhon ug kultural nga bili.
