Sinulat ni Elvira Bongosia
Gihingosgan pa sa gobyerno ang pag-awhag niini sa publiko nga magpabakuna na pinaagi sa pangapod-apod ug hangtod sa P3 milyong premyo alang sa palarang mananaog.
Kini pinaagi sa paglusad niadtong Lunes, Oktubre 4, 2021, sa Department of Health (DOH) sa ilang Facebook page sa “Resbakuna Bakunado Panalo” program.
Sa maong programa, mopili ang DOH gikan sa mga raffle entries ug 50 ka palarang modaog ug P5,000 sa monthly draw gikan Oktubre hangtod Nobyembre ning tuig.
Samtang sa grand draw, tulo ka palarang mananaog ang mahatagan ug P1,000,000 sa grand prize, P500,000 sa 2nd prize, ug P100,000 sa 3rd prize.
Aron makaapil, kinahanglang morehistro pinaagi sa pag-text sa RESBAKUNAREG <space> NAME/AGE/ADDRESS, ug e-send sa 8933.
Human niini, e-send ang raffle entry pinaagi niining format: RESBAKUNA <space> unang letra sa brand sa bakuna/pila ka doses na/local government unit/petsa sa pagbakuna, ug e-send sa 8933.
Makadawat ug confirmation text human niini. May bayad matag text nga P1.
Ang tanang entries mosulod sa Bakunado Panalo database ug awtomatikong makaapil sa monthly ug grand draw nga pangunahan sa DOH sa pakig-alayon sa Philippine Amusement and Gaming Corporation (PAGCOR).
Ang mga indibidwal nga nakadawat pa lang sa unang dose adunay usa ka raffle entry samtang duha ka entries kun kumpletong bakunado na. Kini nagpasabot nga naa sa tulo ka entries kun magparehistro pareho.
Sa mga nakadawat usab ug single-shot Coronavirus disease vaccine, awtomatiko silang mahatagan ug tulo ka raffle entry.
Ang mga senior citizen nga nakadawat sa unang dose makakuha ug duha ka raffle entry, samtang ang kumpletong bakunado adunay unom ka raffle entry.
