Sinulat ni Rey Anthony Chiu
Gitunol sa mga tinugyanan sa Bohol subay sa programa nga Enhanced Comprehensive Local Integration Program (E-CLIP) ang kinatibuk-an nga P65 mil ngadto sa usa ka kanhi rebelde nga karon malinawon nang nanimuyo balik sa sabakan sa balaod, atul sa gipahigayon nga Dagyawan: Talakayan ug Serbisyo Caravan didto sa Lomangog Ubay, niadtong Okt. 7, 2021.
Gidawat ni Jennifer (dili tinuod nga ngalan) 22, anyos ang dinaliang tabang ug tabang para kapanginabuhi-an nga maoy naglangkob sa pasiunang abag sa kagamhanan tungod sa iyang paghukom nga manginabuhing malinawon.
Sugo sa Administrative Order No. 10 series of 2018 ni Presidente Rodrigo Roa Duterte, ug sa napausab nga Administrative Order No. 25 series of 2020, nga nagpalapad sa tanyag sa kagamhanan nga kompleto nga abag ngadto sa mga kanhi naglihok sa kalihukang walhon ug apil na ang mga terorista nga mitahan na ngadto sa kinabuhing linaw ug produktibong molupyo, gitanyag ang hinabang, matud ni Department of Interior and Local Government Bohol Provincial Director Jerome Gonzales, human sa seremonyas sa pagtunol sa hinabang kang Jennifer.
Sumala usab sa joint DILG ug Department of National Defense (DND) Memorandum Circular 2021-01, nga nagladlad sa guidelines sa pagpatuman sa mga hinabang ngadto sa mga kanhi rebelde ug terorista nga gidumala sa DILG, nadawat ni Jennifer ang dinaliang tabang nga P15 mil.
Kini magamit ni Jennifer sa iyang mga ginagmay nga galastohan samtang giproseso pa ang iyang pagkalakip sa opisyal nga listahan sa mga Kanhi Rebelde (KR) ug malihok na ang pagpapas sa iyang mga salaud kauban sa mga nagpabilin nga salaud sa mga aktibong rebelde.
Gawas sa P15 mil, laing P50 mil ang gidawat ni Jennifer alang sa suporta sa kagamhanan sa panginabuhi-an sa KR, ilabi na kay wala kini pundo nga ikasugod sa iyang bag-ong kinabuhi.
Ang P50 mil nga panginabuhian, nakalakip sa Rebel Reintegration Plan sa ECLIP, ug aron maseguro nga dili kini masayang, imonitor sa ECLIP Committee ang gipamuhunanan ni Jennifer.
Dungan niini, giaghat na usab ni Col. Alleson Depayso ang Battalion Commander sa 47IB nga nagbase sa Carmen, ngadto sa mga nagpabilin pa gihapong nanalipud sa dunot nga ideyolohiya nga mosubay sa giagi-an ni Jennifer, tungod kay andam ang kagamhanan nga moalalay aron mapahiluna nga manimuyong wala nay tugaw ug wala nay tigaw.
