Sinulat ni Elvira Bongosia
Gitun-an na karon sa Department of the Interior and Local Government (DILG) ang posibilidad nga ihunong ug ibawal na ang paggamit sa logbooks alang sa contact tracing human makadawat ug taho kalabot sa ‘smishing.’
Matud pa ni DILG Undersecretary ug tigpamaba sa buhatan Jonathan Malaya, makig-alayon sila sa National Privacy Commission (NPC) kalabot sa posibilidad nga padayon nang ibawal ang mga logbooks.
Una niini, nagpagawas ug pasidaan ang NPC kalabot sa smishing nga gi-ubang pulong sa SMS o short messaging service ug phishing, nga gigamit sa pipila ka korap nga indibidwal aron makapangilad.
Sa smishing, magpadala ang mga mangingilad ug text messages nga kunohay gikan sa mga respetadong kumpanya, aron ilaron ang pipila ka indibidwal aron ibutyag ang ilang personal nga impormasyon, sama sa ilang passwords o numero sa credit card aron makawatan.
Matud pa ni Malaya nga mahimong nakuha sa mga mangingilad nga indibidwal ang phone numbers sa mga logbooks nga pasulatan sa mga tawo, sa dili pa mosulod sa mga establisimyento sama sa mga malls, restaurants ug uban pa.
Aron malikayan kini, angay mohatag na lamang ang mga establisimyento ug lahi nga forms o modawat ug digital contact tracing applications sama sa StaySafe app aron makaseguro nga dili makita sa uban ang mga impormasyong gibutang didto.
