Sinulat ni Elvira Bongosia
Nipasidaan ang Philippine Red Cross (PRC) sa publiko kalabot sa nikatap nga malisyusong text gikan sa usa ka nagpakaaron-ingnon nga medical staff sa International Red Cross.
“If you have received one, do not entertain it,” matud pa sa PRC. (Kon nakadawat mo, ayaw tagda.)
Matud pa sa gipagawas nga pasidaan sa PRC, usa kini ka ‘smishing scam’.
Ang smishing text usa ka social-engineering scam kinsang tumong mao ang pagmanipula sa mga katawhan aron makuha ang mga sensitibing datos o impormasyon sama sa mga banking details.
Giklaro sa PRC nga may International Federation of Red Cross and Red Crescent Societies ug International Committee of the Red Cross diin miyembro ang Philippine Red Cross.
Giingong gitawag kining IFRC ug ICRC ug dili International Red Cross.
Pahinumdom pa sa PRC sa publiko nga magbinantayon ug dili tagdon ang bisan unsang mensahe nga naggikan sa nagpailang staff sa International Red Cross tungod kay usa kini ka scam.
