Sinulat ni Elvira Bongosia
Nipasidaan ang Department of the Interior and Local Government (DILG) nga pasakaan nila ug disqualification case ang bisan kinsang kandidato sa 2022 national ug local eleksyon nga mapamatud-ang nagsuporta sa Communist Party of the Philippines/New People’s Army (CPP-NPA-NDF) pinaagi sa pagbayad ug extortion money o “permit to campaign fees.”
Kalabot niini, gipahinumdoman sa DILG ang tanang kandidato kalabot sa Memorandum Circular 2019-26 nga gikonsiderar kining modus isip usa ka klaro nga matang sa ekstorsyon ug pagmantsa sa kasagrado sa right to suffrage o katungod sa pagbotar sa katawhan.
Ubos sa maong direktiba, gimanduan ni DILG Kalihim Eduardo M. Año ang mga local government units (LGUs) ug ang Philippine National Police (PNP) nga siguradohon nga ang tanang kandidato tugotang makasulod nga walay pagbabag sa matag LGU ug garantiyahan ang kahapsay ug kalinaw sa tanang lugar, ilabi na kadtong mga lugar nga gikonsiderar isip ‘hotspots for insurgency.’
Niadtong tuig 2018, gibutyag sa DILG ang usa ka watchlist nga nagsulod sa 349 ka mga lokal nga opisyal sa gobyerno nga adunay kalambigitan ug nagsuporta sa CPP-NPA pinaagi sa paghatag ug extortion money niadtong piniliay sa tuig 2016.
Apan niadtong tuig 2019, 63 ka lokal nga opisyal na lamang ang nataho nga nagsuporta sa CPP-NPA nga hugot nga gipamonitor sa PNP.
