Sinulat sa PRIMER
Mitambong si Gob. Art Yap niadtong Huwebes, Okt. 21, 2021 isip usa ka panelist sa 8th National Health Sector meeting uban ang mga kadagkuan sa World Health Organization (WHO), Department of Health (DOH), ug mga myembro sa private health sector, mga Local Chief Executives ug mga sakop sa medical society sa kalain-laing local governmenr units (LGUs) sa nasud.
Ang duha ka-adlaw nga Zoom teleconference mihatag ug pagtagad sa paghapnig sa kasamtangang kahimtang sa implementasyon sa Universal Health Care (UHC) taliwala sa pandemya diin gihisgutan ang pagkab-ot sa mga katuyoan ubos sa UHC Integration pinaagi sa pagpalambo sa Local Health Systems ug pakigtambayayong sa network sa mga Private Health Care Providers (PHCP).
Human sa mga sesyon, mipadayag si Gob. Yap sa iyang reaksyon diin iyang gikutlo ang mga gipakitang mga modelo nga kasamtangang gisunod sa mga pipila ka LGUs ug PHCP nga maayo ug haum labi na sa pagpasabot sa ‘preventive’ ug ‘curative’ nga aspeto. Apan gisugyot usab niya nga importanteng maklaro ug mahisgutan pagayo ang ‘financial’ nga aspeto niini tungod kay dili tanang LGUs makatuman dayon sa gikinahanglan sa maong sistema.
Alang ni Yap, gikinahanglang maklaro ang pakig-alayon sa LGUs ug PHCP labi na sa expenditures, local investment plan, returns, subsidy ug revenue generation aron maklaro usab kung asang dapita makatabang ang private sector ug kung unsa ang mahimong lihok sa patinabangay ubos sa maong sistema.
Dugang ni Yap nga usa ka hagit isip gobernador sa Bohol nga matuman kining programa diin usa sa mga UHC Integration Sites ang lalawigan.
