Sinulat sa Primer
Mapasalamaton ang katawhan sa Brgy. Alegria sa lungsod sa Carmen sa pagbisita ni Gob. Art Yap niadtong Okt. 19, 2021 human gidala sa kagamhanang probinsyal ang HEART Caravan niadtong dapita.
Gidala sa gobernador ang HEART Caravan sa maong barangay diin kauban niya ang nagkalain-laing buhatan sa kagamhanang probinsyal ug ahensya sa gobyerno aron pagpanghatag ug ayuda ug libreng serbisyo ngadto sa katawhan.
Matud pa sa gobernador, bisan pa ug nag-atubang ta sa dakong hulga niining pandemya dili mapugngan ang mga libreng serbisyo alang sa atong mga kaigsuonan.
Gawas pa niini, mapasalamaton ang gobernador sa Department of Labor and Employment (DOLE) sa tabang nga ilang gihatag alang sa suholan sa atong mga kabatan-onan nga mitrabaho sa kapitolyo ubos sa Special Program for Employment of Students (SPES).
Gipasalamatan usab ni Gob. Yap ang atong mga sakop sa Barangay Health Workers (BHW) sa ilang walay puas nga pagserbisyo ug gitunol kanila ang ilang mga honorarium.
Aduna usab kitay pipila ka mga tourism frontliners nga nakadawat ug tabang pinansyal pinaagi sa Department of Tourism.
Gitunol usab sa gobernador ngadto kang Kap. Quirino Aparicio ang ilang P100,000 nga cheke nga gikan sa kagamhanang probinsyal alang sa ilang panubig.
Kauban sa gobernador sa maong kalihukan mao sila si Board Member Elpidio Bonita, Victor Adlaon nga nag-reprensentar kang Carmen mayor Ricardo Francisco Toribio, Ian Mendez sa “Ako Bisdak” Partylist, 2LT Charmaine Sancho sa 47th Infantry Battalion, Carmen Chief of Police nga si Maj. Jesus Daplin, Barangay Health Worker-Carmen president Saturnina Lague, Barangay Health Worker Federarion president Judith Bunhayag, Barangay Health Worker Coordinator Artemia Lison, Municipal Health Officer Dr. Leva Veligenilao, Vilma Yorong sa Bohol Employment and Placement Office, Kap. Isabelo Sumalinog sa barangay Alegria ug uban pang opisyales sa barangay.
Mitambong si Gob. Art Yap (anaa sa hulagway) sa pagpanghatag sa tabang pinansyal alang sa mga benepisyaryo sa Special Program of the Employment of Students (SPES) ubos sa Department of Labor and Employment (DOLE), niadtong Lunes. Duolan sa 900,000 pesos ang tanang gi-apud-apud alang sa 136 ka mga SPES beneficiaries nga nag-gikan sa Tagbilaran City, Panglao, Dauis ug Loon. Gawas niini, gitunol usab ang financial assistance ngadto sa mga 20 ka freelance tourism workers gikan sa Balilihan, Calape, Catigbian ug Sikatuna apil na ang medical assistance ngadto sa mga benipesyaryo nga si Zandro Mortejo. Sa iyang mensahe, gipa-ambit sa gobernador ang mga programa sa kagamhanang probinsyal ug iyang giawhag ang mga kabatan-onan nga mutabang sa pakigbatok kontra Coronavirus disease pinaagi sa pagsunod sa health protocol. Mitambong usab sa maong pagpanghatag sila Bise Gob. Rene Relampagos, Tagbilaran City Mayor Baba Yap ug First Lady Jane Yap, Director Salome Siaton sa Department of Labor and Employment (DOLE) Central Visayas, Maritess Tantiamco sa DOLE, Winefredo Salas sa Technical Education and Skills Development Authority (TESDA) ug uban pang mga opisyales.