Sinulat ni Rey Anthony Chiu
Kon mopugos gyud ug uli bisan kon wala pay bakuna, unya mosuway ug palusot pinaagi sa peke nga mga dokumento, magbantay.
Matud pa sa Executive Order No. 52 series of 2021, kadtong masakpan nga migamit ug gipeke nga mga papeles aron makalighot sulod sa Bohol, may naghuwat nga silot: P5,000, unya inig abut, adunay pugos nga kwarantina, dili sa balay o sa municipal quarantine, apan sa usa ka hotel nga gitugotan sa Department of Tourism.
Matud pa sa nahisgutan nga executive order, ang pagkwarantina, labing menos sulod sa lima ka adlaw, kanus-a, pugos siya nga magpailawom sa swab test, nga iyang personal nga bayaran.
Kon tinambanon ug kwenta, sa pagkasakop pa lamang, P5,000 na. Pun-an pa sa pagpuyo sa hotel isip kwarantina. Ingnon ta lang nga kini tag P1,000 ang adlaw sa labing barato nga hotel sa lima ka adlaw: lain nga P5,000.
Sundan pa sa Real-Time Polymerase Chain Reaction test (RT-PCR) nga tag P2,800.
Kon sa ka demalas, magpositibo sa RT-PCR, lain nga lima ka adlaw ang madugang sa pagkwarantina, ug taposon kin isa lain nga RT PCR, hangtud nga ang resulta sa test, negatibo na sa Coronavirus disease (Covid).
Sa labing swerte, ang masakpan nga magpalusot sa kaugalingon, labing menos nga gasto, P12,800, wala pay apil niini ang gasto sa kaon samtang anaa sa kwarantina.
Ibutang ta lang nga sa matag kaon, mogasto ug tag P150, o P450.00 ang adlaw sa lima ka adlaw, moabut sa P2,250.00.
Sa labing menos nga kwenta, P15,000 labing gamay ang magasto, kana kun magnegatibo dayon ang usa nga swab test.
Tanan niini, personal nga tulubagon sa nasakpan.
Kini usab nga bag-ong lagda nga gisukip sa EO No 52, na-angin sa mga taho nga nagbutyag nga daghan ang mga nangasakpan sa m,ga tinugyanan nga misuway ug palusot, apan nasakpan ug gidid-an sa pagpasakay sa barko ug eroplano pasulod sa Bohol.
Gitaho ni Dr. Anthony Damalerio, hepe sa Provincial Disaster and Risk Reduction Management Officer nga duolan sa 500 na ang nasakpan sa mga tinugyanan nga nagbantay sa mga utlanan sa Bohol.
Kasagaran nga gipeke nga dokumento mao ang resulta sa RT-PCR, sumala pa sa PDRRMO chief.
Sa mga pantalan, tua didto ang mga tinugyanan sa kapolisan, kasundalohan ug mga sakop sa Philippine Coast Guard nga maoy motan-aw sa mga dokumento nga itunol sa mga pasahero nga motabok paingon sa Bohol.
Niadtong unang mga panahon, matud ni Damalerio, ang masakpan, did-an lamang sa pagsakay sa mga sakyanan paingon sa Bohol.
Kini nga taho nakapahingawan ni Mayor Virgilio Mendez sa San Miguel, kinsa maoy nagpadakop sa mga suspetsado nga naghimo ug mga peke nga dokumento nga nakabiktima sa mga taga Bohol.
Angay kagul-an, matud pa ni Mayor Mendez, didto sa tigum sa Bohol Inter Agency task Force on the Management of Emerging Infectious Disease, Strategic Communications Group niadtong miaging Lunes, Okt. 25, 2021.
Gawas sa RT-PCR, gipeke usab ang S-pass, dugang pa ni Damalerio. Hinuon, gilibkas na ang rekisitos sa RT-PCR sa mga mosulod sa Bohol kon kini kompleto na ang nadawat nga bakuna ug may kapin sa 14 ka adlaw na human sa iyang ikaduha nga tupokan.
Ug aron makalikay sa peke nga mga dokumento, gikalagda usab sa EO 52 ang paggamit sa Vaccination Certificate, ug dili ang vaccination card, isip pass pasulod sa Bohol sa mga bakunado.
Kadtong dili pa makakuha sa ilang vaccination certificate kay wala pa maupload sa ilang local government units (LGU), gikinahanglan makapakita sa ilang pagsuway sa pagkuha pinaagi sa screenshots, ug kini ubanan sa ilang vaccination card, ID nga gi-isyu sa kagamhanan ug ang aprobadong S-pass.
Sa mga wala pa makakompleto sa bakuna, ug wala pa mabakunahi, magpabilin ang rekisitos nga moduso sila sa negatibo nga resulta sa Coronavirus disease (Covid) test pinaagi sa RT-PCR ug morehistro sa S-pass.
