Sinulat ni Elvira Bongosia
Sarado gihapon ang tanang sam-ang sa lalawigan sa Bohol sugod adtong Okt. 29, 2021 hangtod Nobz 2, 2021 agi ug pagpaminus sa risgo sa pagkatap sa Coronavirus disease (Covid) atol sa Kalag-kalag.
Si Gob. Arthur Yap mipagawas sa Executive Order No. 53 kalabot niini.
Matud pa ni Yap nga ang pandemic task force sa gobyerno nipalabang ug resolusyon nga nag-isyu sa guidelines alang sa pagtimaan sa Kalag-kalag karong tuiga taliwala sa Covid pandemic.
Nakalatid sa E.O. No. 53 nga ang publiko mahimong mobisita sa mga sam-ang, memorial parks, ug columbaria sa dili pa ang Oktubre 29 o human sa Nobyembre 2.
Ang mga bisita gilimitahan lamang sa 10 ka tawo matag grupo, ug gitogotan lamang ang 50% nga kapasidad sa lugar nga bisitahon, sa panahon nga ablihan balik ang mga sam-ang.
Kinahanglang estriktong sundon ang minimum public health standards aron mapugngan ang pagkatap sa Covid transmission.
Ipatuman kini sa Philippine National Police (PNP), local government units, paubos ngadto sa mga opisyal sa barangay.
