Sinulat ni Elvira Bongosia
Target sa National Task Force (NTF) Against Coronavirus disease (Covid) nga sugdan sa Nob. 2021 ang pagbakuna sa booster shots alang sa priority sectors.
Kini human gi-aprobahan sa Department of Health (DOH) ang probisyon sa booster shots sa mga fully vaccinated health care workers (A1), nga unang nakadawat ug bakuna niadtong buwan sa Marso 2021.
Prayoridad usab ang mga Senior citizens (A2) ug immune compromised adults (A3) matud pa ni NTF chief implementer Kalihim Carlito Galvez Jr., sa gipahigayong Talk to the People ni Presidente Rodrigo Roa Duterte niadtong Lunes sa gabii, Okt. 25, 2021.
Matud pa ni Galvez nga ang Health Technology Assessment Council (HTAC) ug All Experts Groups on Covid Vaccines nagpagawas ug “positive opinion” sa pagbakuna sa booster shots.
Gidugang pa niini nga gisugdan na sa DOH ang pagproseso sa emergency use authorization (EUA) nga gi-amiyendahan alang sa nagkalain-laing brand sa bakuna nga gamiton isip booster shots.
Matud pa nga duha ka milyong booster doses ang gigahin alang sa A1 priority ug lima ka milyon usab alang sa A2 ug A3 priority groups.
Matud pa kang Galvez, gihulat na lamang nila ang anunsyo sa All Expert Groups kun heterologous (mixed) ba kini o homologous (same brand) vaccination ug alang sa final guidance gikan sa Strategic Advisory Group of Experts on Immunization sa World Health Organization (WHO).
Ang mga gibakunahan ug Sinovac mahimong bakunahan sa Pfizer, AstraZeneca o Moderna isip booster shot.
