Sinulat ni Elvira Bongosia
Gilagdaan ni Presidente Rodrigo Roa Duterte ang balaod nga nagsaka sa mga silot sa kasong perjury.
Gilagdaan sa Pangulo ang Republic Act No. 11594 nga mag-amyenda sa Article 183 ug 184 sa Act No. 3815 o ang Revised Penal Code diin nakapatik ang silot alang sa perjury.
Ubos sa maong balaod, may silot nga ‘prison mayor’ gikan sa minimum period nga unom ka tuig ug usa ka adlaw hangtod walo ka tuig ug medium period nga walo ka tuig ug usa ka adlaw hangtod 10 ka tuig.
Kun ang may kaso usa ka opisyal o empleyado sa gobyerno, mag-atubang kini ug maximum period nga 12 ka tuig, multang dili molapas sa P1 milyon ug dili na mahimong ma-appoint o magkupot ug elective position sa gobyerno.
Kaniadto, ang mga mapamatud-ang guilty sa perjury nag-atubang lamang sa arresto mayor sa maximum period niini hangtod prison correccional sa minimum period niini, o gikan upat ka buwan ug usa ka adlaw hangtod duha ka tuig ug upat na buwang pagka bilanggo.
Mahimong epektibo ang maong balaod 15 ka adlaw human kini mapatik sa mga pamantalaan.
