Sinulat ni Rey Anthony Chiu

Ipatuman na sa Department of Information Communication and Technology (DICT) ang real time nga pagpasulod sa data sa pamakuna, gikan sa pagparehistro ngadto sa screening sa pag-paseguro nga ang bakunahan walay laing mga gibati sa dili pa katupokan ngadto na sa pagtupok.

Kini maoy labing bag-ong kasayuran nga mahimong magpaluag sa nagulgot nga suliran sa pagpagawas sa mga valido ug authenticated nga vaccination certificate nga maoy numero uno nga kinahanglan aron makasulod sa Bohol.

Ang pagpili sa vaccination certificate nga opisyal nga dokumento alang sa pagtino sa kamatuoran sa vaccination card, mitumaw human nataho nga daghan ang mga mingbyahe nga migamit sa mga peke nga dokumento aron lamang makalabang sa Bohol.

Matud ni Provincial Disaster and Risk Reduction Management officer Anthony Damalerio, adunay nasayran nga usa  ka internet café sa silingang lalawigan nga namaligya ug peke nga mga dokumento sa pagbyahe sama sa real time-polymerase chain reaction (RT PCR) S-pass ug vaccine cards.

Ang vaccine certificate nga maoy digital nga data file sa pagpabakuna sa usa  ka tawo, gitipigan sa DICT pinaagi usab sa pagpakig-alayon niini sa Department of Health.

Kini matud pa, misubay sa batakan sa World Health Organization alang sa digital vaccine certificates ug mahimong mabasa sa mga mobile phone applications nga magpamatuod nga dili peke ang giangkon nga ang naghupot sa vaccination card, tinuod nga bakunado.

Kini, katumbas na usab sa mga international nga apps sama sa International Air Transport Association’s Travel Pass, AOKpass, ug uban pa, sa pag-ila sa luwas sa Coronavirus disease (Covid) nga byahedor.

Ang VaxCertPH nga app sa mobile phone, nga madownload sa matag usa, makakita sa datus nga gitipigan sa nasudnong database sa pamakuna nga gitawag ug vaccine information management system nga naghupot usab sa mga datus sa pamakuna sa kalungsuran sa bisan hain mang dapit sa nasud.

Ang vaccination certificate makuha sa us aka bakunado nga tawo, pinaagi sa pagsulod sa www.vaxcert.doh.gov.ph ug pagbutang sa datus sa iyang pagbakuna nga makit-an sa iyang gihuptan nga vaccination card.

Hinuon, human gipagawas ang Executive Order 52, series of 2021 nga maghimong opisyal nga hulip sa mahal nga RT PCR ang Vaccination Certificate, misulbong usab ang tuwaw sa katawhan nga dili nila makita ang ilang mga vaccination records.

Kini, matud pa, kay wala pa maencode ug maupload sa mga local government unit ug rural health unit ang mga kasayuran kabahin sa iyang pagbakuna.

Rason nila, kuwang ang ilang mga tawo nga may teknikal nga kahibaw niini.

Bisan pa man, giaghat na ni Department of Interior and Local Government Bohol Provincial Director Jerome Gonzales ang nga LGU sa pagpaspas sa pag encode ug pagupload sa vaccination data, gipabag-o na usab sa DICT ang ilang pamaagi aron wala nay mabiyaan nga record.