Sinulat ni Rey Anthony Chiu
Usa ka nagsuroy nga museum exhibition ang gibuksan sa National Museum of the Philippines (NMP) dinhi sa Bohol niadtong Nob. 4, 2021.
Ang nagsuroy nga exhibition magpakita sa mga Bol-anon sa tema nga, “Conserving the Natural History of the Visayas Region”.
Ang temporaryo nga exhibition nahimong makasuroy tungod sa paningkamot sa Mobile Museum Boxes Project, usa ka tinambayayongan nga proyekto sa NMP, Forest Foundation Philippines ug sa Western Visayas Association of Museums.
Ang proyekto migamit sa mga kahon diin didto na gipahiluna ang mga exhibition kits.
Pinaagi niini, mas dali ug mas sayon ang pagmontar sa nagkadaiyang lugar sa gawas sa tinuod nga gitukod nga museo.
Matud sa NMP, sa mga kahon didto makita ang nagkadaiyang koleksyon sa mhga specimen ug mga artifacts nga may namontar na nga mga panudlo nga kasayuran aron makahatag ug bag-ong kahibaw sa mga mosuroy ngadto.
Ang Mobile Museum Boxes Project nagtumong sa pagpalapad sa kab-ot sa mga museo, pinaagi sa pagdala na sa mga koleksyon ug paghimog mga exhibitons sa bisan asa mang lugar aron makapalapad sa kasayuran sa katawhan.
Ang exhibition sa Bohol naglangkob sa 12 ka mga kahon nga nagpakita sa 5 ka kategorya: mga tanum sa yuta, mga mananap sa yuta, mga kinabuhi sa tubig, mga produkto gikan sa lasang u gang pagkahulma sa kalibutan.
Ang Mobile Museum Boxes exhibition makit-an sa Gallery 5, sa ika duhang andana sa National Museum Bohol (ang kanhi Bohol Provincial Capitol Building).
Ang exhibition gibuksan adtong Nob. 4, 2021, usab sa kasaulogan sa ika 215 nga adlaw nga natawhan ni Presidente Carlos P. Garcia.
Ang exhibition molanat pa ngadto sa Dec. 31, 2021 sa dili pa kini motabok ngadto sa Iloilo sa Enero sa sunod tuig.
