Sinulat ni Rey Anthony Chiu
Daku ang pasalamat ngadto kang Presidente Duterte sa usa ka benepisaryo sa Pantawid Pamilyang Pilipino Program (4Ps) kay gihimo na nga balaod ang programang naghatag ug katilingbanong alibyo sa mga kabus.
“Daghang salamat sa Presidente Duterte kay sa imong pagpangulo, nahimo na nga balaod ang Republic Act 11310, o ang Pantawid Pamilyang Pilipino Program, kini daku kaayo ug tabang kanamong mga (kabus ug mga sakop sa) pantawid,” saysay ni Stella Bahan Todoc.
Si Todoc, nga taga Barangay Cambuyo niining lungsod, usa ka sakop sa 4Ps sukad pa niadtong 2012, personal nga misaysay sa maayong tabang nga gitanyag sa 4Ps kanilang mga kabus, didto sa gipahigayon nga The Duterte Legacy nga gidala sa Presidential Communications Operations Office (PCOO) sa mga kalungsuran sa Bohol gikan niadtong Nob. 8 hangtud Nob. 11, 2021.
Ang 4Ps mao’y nasudnong stratehiya sa pagpakunhod sa mga kabus ug pagpamuhunan sa tawo aron sa ila usab nga tabang, mapamaayo nila ang ilang kahimtang.
Mahimo kini sa 4Ps pinaagi sa pagpanghatag ug conditional cash transfer (CCT) ngadto sa mga kabus nga banay sulod sa 7 ka tuig aron lamang makab-ut ang tumong niining nahisgutan na sa unahan.
Matud pa usab, mahimo sa National Advisory Council (NAC) nga lugwayan pa ang lanat sa tabang sa 4Ps kong gikinahanglan.
Ang 4Ps una na nga gipasugdan sa Administrasyon ni Presidente Gloria Macapagal Arroyo, ug miabut pa ngadto sa administrasyon ni Presidente Benigno Aquino III, apan nagpabilin nga nameligro nga mapapas na.
Daghan nang Administrasyon ang milabay apan wala gyud mapabalaod ang Pantawid, hangtud miabut si Presidente Duterte nga nagbili sa iyang di hikalimtan nga legasiya.
Matud ni Todoc, ang 4Ps gikuyogan pa sa daghan pa nga abag sa goberno ngadto sa mga kabus.
Sa 4Ps nga nagtutok sa pagtabang sa kabus nga makahatag solusyon sa ilang mga suliran sa kahimsog sa panlawas, nutrisyon ug edukasyon, anaa ang Family Development Sessions nga nagpakita sa kamahinungdanon sa kaugalingong pagtabang aron moasenso.
Nadawat usab nila ang Universal PhilHealth Benefits, ug P394,674 nga hinabang panginabuhian pinaagi sa Sustainable Livelihood Program sa Department of Social Welfare and Development (DSWD), gawas pa sa maayong proyekto nga pagsemento sa ilang kadalanan subay sa Kapig Bisig Laban sa Kahirapan-Comprehensive and Integrated Delivery of Social Services.
Gisaysay usab ni Todoc ang nakuha nilang libre nga bansay sa Technical Education Skills Development Authority (TESDA) alang sa iyang bana nga kanhi pang-labor lang ang gisaligan.
“Labor ra unta siya sa una, karon nakakuha siya ug bansay sa TESDA sa Small Metal Arc Welding, ug karon, makamao na mo welding,’ matud ni Todoc.
Sa iyang kabahin, isip 3Ps beneficiary, nakasulod usab siyag usa ka bansaybansay sa Bread and Pastries NC II sa TESDA ug karon may katakus na nga mamuhunan sa nakat-onan nga abilidad.
