Sinulat ni Elvira Bongosia
Gikan sa usa ka manggi-uwawon nga bata, nabuntog ni Meriam Lagura, 25 anyos nga taga Sagnap, niining lungsod sa Loay ang gapos nga nakapugong kaniya nga makig-atubang ug daghang mga tawo.
Gawas pa nga natikangan niya ang pagsuway, may ikapakita na usab siya nga kita isip job-order worker sa Municipal Treasurer’s Office, niining tanan siya nagpasalamat sa Government Internship Program nga tanyag sa Department of Labor and Employment (DOLE).
Usa ka gradwado sa Bachelor of Science in Education, naglaum si Meriam o Mime nga makasulod ug trabaho isip maestra, apan wala pa miduyog ang kahigayonan.
Agi ug pagpaabut, nagtaghuwat kini ug pangita ug kasudlang trabaho hangtud nga ming apply kini sa GIP nga tanyag sa DOLE.
Gipasabut sa tinugyanan sa DOLE Bohol nga ang GIP programa sa kagamhanan sa pagpasuway sa mga trabahante sa pagpangalagad sa mga buhatan sa kagamhanan aron makat-on sa mga kina-iya, gimbuhaton ug makakuha sa mga abilidad sa pagpadagan sa opisina.
Daan na nga borong si Mimei, ilabi na kon bation niya nga labaw sa iyaha ang ikaatubang.
Apan sa GIP, nga gihimong tulay sa kagamhanan aron kahatagan ang kabataan sa higayon nga makapakita sa ilang talento ug kakayahan sa natad sa serbisyo publiko, sa pamasin nga ang mga labing maayong trabahante makapadayon na sa ilang serbisyo sa katawhan pinaagi sa buhatan sa kagamhanan.
Swerte si Mimie nga nadawat sa munisipyo sa Loay sa iyang GIP.
Didto ma assign sa buhatan sa Municipal Treasurer’s Office niadtong Sept. 2020 ngadto sa Nob. 2020, sa tulo ka buwan nga pagpakig atubang sa mga mamayad ug buhis, mamayad sa tubig ug sa pagsubay sa mga balayronon.
Human sa pipila ka adlaw, hinay nga nakat-on si Mimie sa pagpakig-atubang sa tawo dala sa iyang trabaho.
Swerte pa si Mimie kay human sa tulo ka buwan nga internship, human sa napakita niyang maayong trabaho, nasurop siya sa local government unit (LGU) Loay diin hangtud karon siyang nagtrabaho didto.
Tungod usab sa iyang kasinati-an, mikuha pa siya ug laing kurso pinaagi sa Technical Education and Skills Development Authority (TESDA).
Gawas nga si Mimie nagtrabaho na sa munisipyo isip job order worker, nagkat-on na usab siya sa pagluto ug pan ug mga pastries, butang nga matud niya, makatabang sa iyang pagpanimpalad pohon.
Niining tanan, kong wala pa ang mga programa sa goberno nga gipatuman ni Presidente Duterte, hayan pabilin pa si Mimie nga natanggong sa balay samtang nagpaabut kanus-a makatrabaho, samtang naghambin sa kaburong.
Si Mimie usa lamang sa liboan ka mga estudyante nga nakasinati sa programa sa panerbisyo sibil, ug usa sa mga mihatag ug testimonya sa gipahigayon nga Duterte Legacy Caravan sa lungsod sa Loay.
Ang Duterte Legacy Caravan miduaw sa Loay niadtong adlaw Nob. 8, 2021.
