Sinulat ni Rey Anthony Chiu
Sulod sa usa ka semana, mikabat lamang sa 19,753 ka tawo sa matag adlaw ang nabakunahan sa mga vaccination teams nga anaa nahimutang sa mga vaccination sites ug sa mga mobile vaccination teams.
Kini usab bisan, matud pa, kaya kaayo sa Bohol ang mamakuna sa 7,500 sa usa ka adlaw.
Gipasabut sa mga tinugyanan sa pagpamakuna nga igo na ang 150 ka tawo ang mabakunahan sa usa ka vaccination site sa usa ka adlaw.
Kasamtangang may kapin sa 60 ka vaccination sites ug mobile vaccination teams ang ania sa Bohol, ma pa sa mga tinubdan sa Department of Health.
Ang ubos nga nakab-ot sa pamakuna, nahitabo bisan pa nga may nahibilin pa nga 483,276 ka doses sa bakuna nga magamit alang sa mga vaccination rollout aron mas mapadali ang pagkab-ut sa Bohol sa herd immunity.
Sumala sa taho sa Bohol Inter Agency task Force (BIATF), sa ilang taho Nob. 4, 2021, may 15,159 lamang ang nadugang sa ihap sa mga natupokan sa unang dose sa bakuna, samtang mas ubos pa gayud ang nadugang sa mga natupokan sa ikaduhang bakuna batok sa Coronavirus disease (Covid).
Kahinumduman nga niadtong Okt. 27, 2021 gikataho nga aduna lamay 238,165 ka mga Bol-anon nga nabakunahan sa unang dose sa bakuna.
Human sa usa ka semana, napun-an lamang kini ug 15,159 ka Bol-anon nga may una na nga bakuna.
Sa kinatibuk-ang 253,324, ang may unang tupokan sa bakuna dinhi, anaa na sa 18.16% sa kinatibuk-ang populasyon.
Sa katapusang semana sa Oktubre, may 240,430 na ka Bol-anon nga may kompleto nga bakuna ug hingpit nga panalipod batok sa grabe nga sakit sa Covid.
Paglabay sa usa ka semana, napun-an kini ug 4,594 lamang ka tawo nga nakabaton ug kompleto nga panalipod batok sa sakit.
Kini nga kadaghanon, 17.57% pa gihapon sa kinatibuk-ang populasyon sa Bohol.
Tuyo pa gihapon sa Bohol ang pagkab-ot sa herd immunity, o pagpabakuna sa 70% sa kinatibuk-an niini nga populasyon, sa labing dali nga panahon.
Kini bisan pa kon nagka nindot na ang sitwasyon sa Covid sa Bohol tungod sa nagkadyutay nga bag-o ug aktibong kaso, nagkataas ang recovery rate ug nagkunhod ang mga nangamatay.
