Sinulat ni Elvira Bongosia
Nipagawas ug pahayag ang Food and Drugs Administration (FDA) nga sa pagkakaron, wala pa’y nataho nga adverse reactions sa mga bata nga naa sa 12 hangtod 17 anyos nga age group nga gibakunahan sa ilang first dose sa Covid disease (Covid) vaccine.
Matud pa sa pahayag ni FDA Director General Eric Domingo, pipila lamang sa mga bata nga natupokan sa Pfizer vaccine ug usa nga gibakunahan ug Moderna ang nakasinati ug allergies, hyperventilation, ug post-vaccination body pain apan naayo ra pagka-sunod adlaw.
Sa pagkakaron, aprubado na sa FDA ang Pfizer ug Moderna Covid vaccines alang sa mga bata gikan 12 hangtod 17 anyos.
Gidugang pa ni Domingo nga dili na kinahanglan magpakita ang mga menor-de-edad nga walay medikal nga kondisyon ug medical certificates gikan sa ilang doktor, sa dili pa bakunahan, gawas na lamang sa may mga comorbidities.
Giklaro ni Domingo nga dili kinahanglan ug medical certificate aron magpabakuna ang mga bata 12-17 anyos basta walay sakit, moadto lamang sa vaccination centers aron mabakunahan.
Gisugdan sa gobyerno ang pediatric inoculation program niadtong Okt. 15, 2021 alang sa may mga comorbidities, ug niadtong Nob. 3, 2021 usab ang tanang menor-de-edad apil ang 12-17 age group.
