Sinulat ni Elvira Bongosia
Gihimo nang requirement sa pagkakaron sa mga magtutudlo ug non-teaching personnel nga moapil sa limitadong face-to-face classes sa mga kolehiyo ug unibersidad ang pagparehistro sa PhilHealth, matud pa sa Commission on Higher Education (CHED).
Matud pa sa pahayag ni CHED Executive Director IV Atty. Cinderella Jaro, kining lakang magseguro nga kong masakit man sa Coronavirus disease (Covid) ang usa ka magtutudlo o non-teaching personnel, may madawat siyang mga benepisyo gikan sa PhilHealth.
Giingong pinaagi niining sitwasyon, ang PhilHealth na ang motubag sa ilang mga panginahanglanon kong mataptan sa Covid.
Samtang niingon usab si Jaro nga angay aduna usab isolation facilities ang mga kolehiyo ug unibersidad nga mosalmot sa face-to-face classes.
Kinahanglan nga mopaubos usab sa disinfection ang mga classrooms kong adunay magpositibo sa Covid.Alang sa mga magtutudlo ug estudyante, miingon si Jaro nga angay magpakita usab sila ug pagmatuod nga bakunado na sila batok Covid aron mosalmot sa in-person classes.
