Sinulat ni Rey Anthony Chiu
Gusto ni Gobernador Arthur Yap nga himoon sa mga tinugyanan sa Bohol ang pagkwenta ug balik kun pila na gayud ang nabakunahan, aron sayran kun dili ba imposible ang pagpabakuna sa 80 mil ka Bol-anon sa matag adlaw sa Nobyembre 29, Nobyembre 30 ug Disyembre 1, 2021.
Kini samtang gitaho na sa mga tinugyanan sa Tagbilaran City nga ila na nga nakab-ot ang 91% sa pagpamakuna sa ilang kinatibuk-ang populasyon.
Hinuon, dili pa mapiho kon ang 91% sa Tagbilaran, naglakip na ba sa taga ubang mga kalungsuran nga didto bakunahi sa syudad, sa ilang pagbukas sa pamakuna sa mga dili taga didto.
Ang nasudnong Inter Agency task Force ug ang mga tinugyanan sa Department of Health (DOH), milansang sa 240,000 ka mga Bol-anon nga gitarget sa tulo ka adlaw nga Enhanced Vaccination program nga gipatunong sa National Heroes Day, Nobyembre 30, 2021.
Apan sa dili pa mosaad ang Bohol nga gukdon ang nahisgutan nga kadaghanon, matud sa gobernador nga mas maayo nga maklaro ang mga numero aron masuta kon kaya bas a Bohol ang pagkab-ot sa 80,000 ka tawo nga mabakunahan sa matag adlaw nianang tulo ka adlaw nga pamakuna.
Giangkon na sa gobernador nga lisud sa Bohol ang pagkab-ot sa 80,000 ka tawo nga mabakunahan sa usa ka adlaw, naglisud man gani ug kab-ot sa 20,000 lamang.
Hinuon, tungod sa pagbukas sa pamakuna sa mga 12-17 anyos, mahimong madugangan ang mga kabakunahan, apan, punto sa gobernador, mas maayo kon makuha na gayud ang saktong ihap sa pagka karon, aron mas dali ga makalansang sa target niini.
Dugang pa, kun masayud na ang Bohol sa matuod nga mga ihap, mas dali na nga ikapasabut sa nasudnong IATF nganong dili na maabut ang 80,000 sa matag adlaw nga bakunahan subay sa gitarget sa nasudnong IATF alang sa Bohol.
Laing nga posibleng paagi aron mas daghan ang maabut sa Bohol sa tulo ka adlaw nga pamakuna mao ang pagpatukod sa mga kalungsuran sa mobile vaccination teams, kinsa maoy mosulod sa mga hilit nga barangay aron maghimo sa pamakuna.
Nahibaw-an usab nga sa 47 ka kalungsuran ug usa ka syudad sa Bohol, 20 ka lungsod niini ang nagsalig lamang sa usa ka vaccination site.
May 15 ka lungsod ang nakatukod hinuon ug duha ka vaccination site ug lain nga 6 ka kalungsuran ang may 3 ka vaccination sites.
Ang nahibilin nga pito ka kalungsuran, nakatukod ug labaw sa upat ka vaccination sites, maong mas daghan na sila ug naabut.
Sa walo ka buwan na nga milabay, ang Bohol nakahimo lamang sa paghatag ug kompleto nga bakuna sa 32% sa gitumong niining bakunahan nga 70% sa kinatibuk-ang populasyon niini.
