Sinulat ni Rey Anthony Chiu
Gitumbok sa Bohol Inter Agency task Force (BIATF) nga ang pagpahimutang ug mobile vaccination team maoy labing maayong buhaton aron makapadali sa Bohol sa pagkab-ot sa giingon nga herd immunity.
Kini samtang sa 47 ka kalungsuran ug usa ka syudad sa Bohol, 20 niini ang may usa lamang ka vaccination site, 15 ka lungsod ang nakatukog ug duha ka vaccination site samtang may 6 ka kalungsuran nga may 3 ka vaccination sites ug ang nahibilin nga pito, nakatukod ug labaw sa upat ka vaccination sites.
Kini nga kasayuran mitumaw human gituki sa Bohol atul sa online nga tigum sa BIATF kon ngano ug unsay rason nga hinay man ang dagan sa pamakuna sa Bohol.
Sa walo ka buwan na nga milabay, ang Bohol nakahimo lamang sa paghatag og kompleto nga bakuna sa 32% sa gitumong niining bakunahan nga 70% sa kinatibuk-ang populasyon niini.
Sa gibanabana nga inadlaw nga kapasidad sa Bohol nga mobakuna sa 7,500 ka tawo, namatud-an nga ang kasamtangan nga inadlaw nga accomplishment sa pamakuna sa Bohol, nag average lamang og 2,669 ka tawo.
Gitumbok nga sa diha nga nagpasugod ang pipila ka lungsod sa Bohol sa mga mobile vaccination teams, mingpaspas ang pamakuna, apan didli pa gyud igo nga mopasaka sa kadaghanon sa bakunado nga mga tawo.
Matud pa sa Department of Health pinaagi ni nurse Neil John Oclarit, may usa usa ka lungsod nga may pribadong institusyon nga mi-abag sa pamakuna.
Ang pagpamakuna, maoy gitumbok sa mga batid sa kasanihan nga labing epektibo nga lakang sa pagpangontra sa coronavirus disease.
Matud pa ni Provincial Administrator Kathyrin Pioquinto, kun magsalig lang gayud sa mga nahimutang nga vaccination sits, dili gyud dali nga makab-ot ang target sa Bohol nga herd immunity.
Gikinahanglan ang dugang nga mga mobile vaccination teams nga maoy maka-adto sa mga hilit nga lugar aton mapataas pa nato ang atong mga ihap ug patas-on ang accomplishment, dugang ni Pioquinto.
Ang tanan nga namatay sa Coronavirus disease (Covid) dinhi sa Bohol, pulos mga walay bakuna, samtang giingon man nga may nataho nga namatay nga bakunado, kini nahibaw-an usab nga adunay mga sakit na nga daan nga giantus sa pasyente, nga wala na makaya pa sa bakuna sa pagbatok sa pagtakod sa Covid.
Karong hinapos sa buwan, giingon nga mosuway ug kab-ot ang Bohol sa labing daghang mabakunahan sa tulo ka adlaw dungan sa Enhanced Vaccination program nga mahitabo sa Nobyembre 29 ngadto sa Disyembre 1, 2021.
