Sinulat ni Elvira Bongosia
Ang bisan unsang paglapas sa health and safety protocols sa panahon sa pagpangampanya karong adunay pandemya usa ka election offense.
Kini matud pa sa Commission on Elections (Comelec) diin usa hangtod unom ka tuig nga pagkabilanggo ug diskwalipikasyon nga makabotar ug moalagad sa gobyerno ang silot nga nagpaabot sa bisan kinsang molapas sa Comelec Resolution No. 10730.
Apil na niini ang di pagsunod sa usa ka metrong physical distancing; di pagsuot ug face shield ug facemask; kinahanglan usab ang regular nga paglimpyo sa kamot; ug saktong gawi sa pag-ubo ug pagbahing.
“Any violation of Fair Elections Act and these Rules shall constitute an election offense punishable under the first and second paragraph of Section 264 of the Omnibus Election Code and other pertinent laws, rules and regulations, whenever applicable,” base sa nakalatid sa resolusyon.
Pamultahon usab ang partido politika nga mapamatud-ang molapas sa mga patakaran ug di moubos sa P10,000.
Samtang ang mga nag-organisa sa kampanya padusuon ug notarized affidavit of compliance with health protocols sa Comelec sulod sa 24 oras human ang pisikal nga pangampanya.
Magsugod ang campaign period sa nasudnong posisyon gikan Pebrero 8, 2022 hangtod Mayo 7, 2022 samtang sa mga lokal nga posisyon magsugod Marso 25, 2022 hangtod Mayo 7, 2022.
Ang pagkapakyas sa paghimo niini adunay tukmang silot base sa Republic Act No. 11332.
