Sinulat ni Rey Anthony Chiu
Ming-us-os na ang mga kaso sa pagkamatay sa coronavirus disease (COVID) dihang mitala lamang kini ug 22 ka kaso, kon intandi sa miaging buwan.
Subay sa taho sa Bohol Inter Agency task Force on the management of Emerging Infectious Diseases (BIATF) mitala ug 92 ka kaso sa pagkamatay dala sa Coronavirus disease (Covid) niadtong Okt. 1 ngadto sa 29, 2021.
Sa laing bahin, 22 na lang ang walay swerte ug giabut sa pagkamatay tungod sa gikahadlokang sakit gikan sa Nob. 1 ngadto sa 29, 2021.
Ang tataw nga pag-ubos sa mga kaso, kasagaran gipasangil sa nagkadaghan nan ga mga Bol-anon nga nabakunahan batok sa hilabihan ka mananakod nga sakit nga moduso gyud sa mga wala bakunahi nagdto sa mas dako nga posibilidad sa kamatayon.
Ubos man ang kaso sa kamatayaon sa Covid karong nga panahona, gipahinumdom gihapon sa mga tinugyanan sa BIATF mapanalipdan sa sakit pinaagi sa pag-amping ug pagpabakuna.
Sa laing bahin, gikan sa 342 ka aktibong kaso sa Okt. 28, 2021, 85 na lang ang namatikdang kaso niadtong, Nob 29, 2021.
Ang paggamay usab sa mga aktibo nga kaso, gipasangil sa nagkadaghan na ng mga tawo ang nabakunahan ug wala nay mga kaso nga mingtumaw.
Kini bisan pa man nga may kapin sa tunga kamilyon pa ka mga Bol-anon ang gikinahanglan nga abton aron makab-ot sa Bohol ang herd immunity.
Tumong sa mga local nga kagamhanan ang pagkab-ot sa herd immunity sanglit, pinaagi niini, mabuntog na ang sakit nga mipatay sa 577 na ka Bol-anon.
Bisan pa usab nini, napaugpot na usab ang mga katawhan dihang nataho nga ang Covid virus, naghimo na usab ug laing dagway.
Didto sa ubang mga nasud, kapid-an ka mga katawhan ang nangamatay tungod sa Delta variant sa Covid.
Human sa pagdagsang sa mas makalilisang nga Covid variant, lain na usab nga pag-usab sa dagway sa Covid ang namatikan ug gitutokan karon: ang omicron variant, nga giingon nga dili na usab, matud pa, madutlan sa bakuna.
